पाचगणी / लहू चव्हाण : पर्यटननगरी पाचगणीत पायी जाणाऱ्या शिक्षकाला पाच ते सहा जणांनी गंभीर मारहाण करत लुटण्याचा प्रकार घडला असून, ही घटना टेबललॅंड रस्त्यावर रात्री साडेनऊच्या सुमारास घडली.
विवेक जगन्नाथ हेंगडे (वय ५८, रा.गोडवली, ता.महाबळेश्वर) यांनी पाचगणी पोलिस ठाण्यात फिर्याद दिली आहे. विवेक हेंगडे नेहमीप्रमाणे टेबललॅंड मार्गे गोडवलीला चालत जात असताना काॅनव्हेंट हायस्कूलच्या समोर असणाऱ्या पाण्याच्या टाकीजवळ पाच ते सहा अनोळखी लोकांनी हेंगडे यांना अडवले. त्यांच्याकडे पैशाची मागणी केली. त्यावेळी हेंगडे यांनी ‘माझ्याकडे पैसे नाहीत’, असे सांगितले.
त्यानंतर आरोपींनी त्यांना शिवीगाळ करत मारुन टाकण्याची धमकी दिली. त्यांचे खिसे चाचपून खिशात असणारे तीनशे रुपये काढून घेतले. हेंगडे यांच्याकडे कमी पैसे मिळाल्याने आरोपींनी त्यांना हाताने व दगडाने मारहाण करत गंभीर जखमी केले. ही घटना पर्यटननगरीत घडल्याने पर्यटकांसह स्थानिकांत भीतीचे वातावरण पसरले आहे.
याप्रकरणी पाचगणी पोलिस ठाण्यात फिर्याद दाखल झाली असून, पुढील तपास सहाय्यक पोलीस निरीक्षक राजेश माने करत आहेत.
