वर्धा: वर्धा जिल्ह्यातील (Vardha Crime) आर्वी शहर हादरवून सोडणारी (Vardha News) घटना गुरुवारी दुपारी गांधी चौकात घडली. प्रेमसंबंधातून सुरू झालेल्या वादाचा शेवट एका 30 वर्षीय तरुणाच्या निर्घृण हत्येत झाला आहे. मृत व्यक्तीचं नाव सलीम सबदर शा (रा. संजय नगर, आर्वी) असं असून, पोलिसांनी या खुनाच्या घटनेनंतर अल्पावधीतच आरोपी निखिल बुरे (रा. हरदोली) याला अटक केली आहे.
प्राथमिक माहितीनुसार, गेल्या काही महिन्यांपासून सलीम शा आणि निखिल बुरे या दोघांमध्ये एका तरुणीवरून वाद सुरू होता. दोघांनाही तीच मुलगी आवडत होती. या कारणावरून त्यांच्यात राग, चिडचिड आणि सततचं भांडण सुरू होतं. परिसरातील नागरिकांनी अनेक वेळा या वादाला सामोपचाराने सोडवण्याचा प्रयत्न केला, मात्र त्यातून काहीही निष्पन्न झालं नाही. शेवटी या वैराचं रूप जीवघेण्या संघर्षात बदललं.
गुरुवारी दुपारच्या सुमारास गांधी चौकात अचानक सलीम आणि निखिल यांच्यात पुन्हा वाद सुरू झाला. सुरुवातीला दोघांमध्ये बोलाचाली झाली. वाद अधिक चिघळताच निखिलने अचानक आपल्या जवळील धारदार शस्त्र बाहेर काढलं आणि सलीमवर वार केले. वार इतके जबरदस्त होते की, सलीम गंभीर जखमी होऊन जमिनीवर कोसळला.
घटनास्थळी उपस्थित असलेल्या नागरिकांनी तातडीने जखमी सलीमला रुग्णालयात हलवलं. मात्र, डॉक्टरांनी तपासणी केल्यानंतर त्याला मृत घोषित केलं. या धक्कादायक घटनेची माहिती मिळताच आर्वी पोलिसांनी तत्काळ घटनास्थळी धाव घेतली. काही तासांच्या आतच आरोपी निखिल बुरे याला पोलिसांनी ताब्यात घेतलं. त्याच्याविरुद्ध हत्येचा गुन्हा दाखल करण्यात आला असून पुढील तपास सुरू आहे.
घटनेनंतर गांधी चौक परिसरात तणावाचं वातावरण निर्माण झालं. सलीमचा मृतदेह पाहून नागरिकांत संताप उसळला. पोलिसांनी परिस्थिती नियंत्रणात ठेवण्यासाठी घटनास्थळी मोठा बंदोबस्त तैनात केला. तणाव वाढू नये म्हणून पोलिसांनी नागरिकांना शांततेचं आवाहन केलं आहे.
या घटनेमुळे आर्वी शहरात भीतीचं वातावरण पसरलं आहे. मध्यवर्ती भागात दिवसाढवळ्या झालेल्या या हत्येमुळे स्थानिक नागरिक हादरले आहेत. प्रेमसंबंधासारख्या वैयक्तिक कारणावरून युवकांमध्ये इतका मोठा संघर्ष होऊन त्याचा शेवट खुनात झाल्याने समाजमनातही प्रश्नचिन्ह उपस्थित झाले आहे.
