नागपूर : नागपूर जिल्ह्यातून एका भीषण अपघाताची बातमी समोर येत आहे. भरधाव येणाऱ्या ट्रव्हल्सने रस्त्याच्या बाजूला उभ्या असलेल्या ट्रकला धडक दिली असून या अपघातामध्ये चार जणांचा जागीच दुर्दैवी मृत्यू झाला आहे. हा अपघात इतका भीषण होता की ट्रव्हल्सची समोरील बाजूचे मोठं नुकसान झाले आहे. अपघात झाल्यानंतर आजूबाजूच्या लोकांनी बचावकार्यासाठी तात्काळ धाव घेत मदत केली. त्याशिवाय पोलिसांना याबाबतची माहितीही दिली गेली. पोलिसांनी तत्काळ घटनास्थळी दाखल होत जखमींना उपचारासाठी रुग्णालयात दाखल केले.
याबाबत अधिक माहिती अशी की, नागपूर भिवापूररोडवर ट्रक आणि खासगी ट्रव्हल्सचा भीषण अपघात झाला आहे. उभ्या ट्रकला ट्रॅव्हल्सने जोरदार धडक दिली. ट्रकला धडक दिल्यानंतर ट्रव्हल्स बसच्या बाजूला असलेल्या हॉटेलमध्ये घुसली. त्यामुळे या अपघातात हॉटेलचेही मोठे नुकसान झाले आहे. ट्रव्हल्स आणि ट्रकच्या या अपघातात चार जणांचा जागीच मृत्यू झाला आहे. तसेच दहा पेक्षा जास्त जण जखमी झाले असल्याची माहिती मिळत आहे. जखमींवर जवळील रुग्णालयात उपचार सुरु असून पोलिस या घटनेचा तपास करत आहेत.
