नागपूर : कोर्टाच्या आदेशाची अंमलबजावणी करण्यास टाळाटाळ करणे नागपूर (Nagpur News) जिल्ह्यातील भद्रावती तालुक्याचे तहसीलदार राजेश भांडारकर आणि नायब तहसीलदार सुधीर खांडरे यांना चांगलेच महागात पडले आहे. महसूल आणि वन विभागाने तातडीने कठोर पाऊल उचलत दोघांनाही निलंबित करण्याचे निर्देश दिले आहेत. महसूल विभागाचे अवर सचिव प्रवीण पाटील यांनी या अधिकाऱ्यांचे निलंबन केले आहे.
नेमकं प्रकरण काय?
शेतकरी परमेश्वर मेश्राम यांच्या शेतजमिनीवर त्यांचे आणि त्यांच्या वारसाचे नाव, गाव नमुना सातमध्ये नोंदवण्याचे न्यायालयाचे स्पष्ट आदेश होते. मात्र, भांडारकर आणि खांडरे या अधिकाऱ्यांनी न्यायालयीचे आदेश असूनही प्रकरण निकाली काढले नाही. त्यांनी मालमत्तेच्या मालकी हक्काबाबत वाद असल्याचे कारण देत नोंदणी नाकारली.
या दिरंगाईमुळे निराश झालेल्या मेश्राम यांनी 26 सप्टेंबर रोजी तहसील कार्यालयात विष प्राशन करून आत्महत्येचा प्रयत्न केला. सुदैवाने त्यांना त्वरित रुग्णालयात दाखल केल्याने त्यांचा जीव वाचला.
अशातच न्यायलयाच्या आदेशाची अंमलबजवाणी होत नसल्याची दखल न्यायालयाने घेत तत्काळ महसूल अधिनियम 1966 आणि नागरी सेवा वर्तणूक नियम 1969 च्या नियमांचे उल्लंघन केल्याचा ठपका भांडाकर, खांडरे या अधिकाऱ्यांवर ठेवत कारवाईचे निर्देश देत तत्काळ निलंबित करण्यास सांगितले. मेश्राम यांनी विष प्राशन केल्याने जिल्ह्यातील शेतकरी संघटना आक्रमक झाल्या होत्या. त्यांनी देखील तत्काळ कारवाई न झाल्यास आंदोलनाचा इशारा दिला होता.
दरम्यान, अवर सचिव प्रवीण पाटील यांनी दिलेल्या निलंबनाच्या आदेशानुसार, भांडारकर आणि खांडरे यांना जिल्हाधिकाऱ्यांच्या परवानगीशिवाय मुख्यालय सोडता येणार नाही. तसेच, निलंबनाच्या काळात खासगी नोकरी किंवा व्यवसाय करता येणार नाही, तसे केल्यास त्यांचा निलंबन भत्ता रद्द केला जाईल.
