डॉ. अशोक बालगुडे
मुंबई, ता. 20 शिक्षक होण्याच्या लाखो उमेदवारांच्या भवितव्याशी खेळ करणाऱ्या महा-TET पेपरफुटी प्रकरणात पैशांचा धक्कादायक व्यवहार समोर आला आहे. पोलिसांच्या आरोपपत्रानुसार, पेपर मिळवून देण्यासाठी उमेदवारांकडून तब्बल एक लाख रुपये घेतले जात होते. व्यवहाराची हमी म्हणून काही उमेदवारांची मूळ शैक्षणिक कागदपत्रेही ताब्यात घेतल्याचे तपासात नमूद आहे.
पेपरफुटीचे धागे उत्तर प्रदेशातील आग्रा येथील मुद्रणालयापर्यंत पोहोचले आहेत. प्रश्नपत्रिका बुटाच्या तळव्याखाली लपवून बाहेर काढल्याचा पोलिसांचा आरोप असून, त्यासाठी काही जणांना हजारो रुपयांचा मोबदला दिल्याचे आरोपपत्रात नमूद आहे.
सुमारे 3500 पानी आरोपपत्रात 18 आरोपींचा उल्लेख असून 16 जणांना अटक झाल्याचे वृत्त आहे. दोन आरोपी फरार आहेत.
हजारो रुपयांत छापला जाणारा प्रश्नपत्रिकेचा कागद लाखांत विकला गेला; पण त्याची खरी किंमत मोजायची वेळ आली ती परीक्षेवर विश्वास ठेवणाऱ्या उमेदवारांवर. या संपूर्ण साखळीतील सूत्रधार कोण, हा प्रश्न अद्याप कायम आहे. आरोप न्यायालयात सिद्ध होणे बाकी आहे.
