पुणे, महाराष्ट्र: राज्यात विनाअनुदानित आणि अंशतः अनुदानित शाळांमधील शिक्षकांनी आपल्या मागण्यांसाठी आज, ८ जुलै, आणि उद्या, ९ जुलै, असे दोन दिवस राज्यव्यापी आंदोलनाची हाक दिली आहे. या आंदोलनामुळे शाळा बंद राहतील असा अंदाज होता, मात्र महाराष्ट्र शिक्षण विभागाने एक महत्त्वाचा आदेश काढला आहे. यानुसार, आंदोलन असले तरी राज्यातील कोणत्याही शाळा आज आणि उद्या बंद राहणार नाहीत.
शिक्षणाचा खंड पडू नये यासाठी शाळा सुरूच राहणार आहे. विद्यार्थ्यांचे शैक्षणिक नुकसान होऊ नये, यासाठी हा निर्णय घेण्यात आल्याचे माध्यमिक व उच्च माध्यमिक शिक्षण विभागाचे संचालक महेश पालकर यांनीस्पष्ट केले आहे. त्यामुळे, शिक्षकांच्या आंदोलनामुळे शाळांना सुट्टी असेल, अशा अफवांवर विश्वास न ठेवण्याचे आवाहन करण्यात आले आहे.
आता शिक्षण विभागाने शाळा सुरू ठेवण्याचे आदेश दिल्याने पालक आणि विद्यार्थी यांच्यात संभ्रम वाढला आहे. शासनाने विद्यार्थ्यांच्या हितासाठी शाळा सुरू ठेवण्याचे निर्देश दिले आहेत. एका बाजूला शिक्षक आपल्या हक्कांसाठी लढत आहेत, या विचित्र परिस्थितीमुळे पालकांना नक्की काय करावे हे समजत नाहीये. शिक्षण विभागाच्या या निर्णयाचा आंदोलनावर काय परिणाम होतो, याकडे आता सर्वांचे लक्ष लागले आहे.
