Shivneri Bus: मुंबई: मुंबई–पुणे महामार्गाची ‘राणी’ म्हणून ओळख असलेल्या शिवनेरी बस सेवेचा विस्तार आता राज्यातील इतर शहरांपर्यंत करण्यात येणार आहे. परिवहन मंत्री तथा एसटी महामंडळाचे अध्यक्ष प्रताप सरनाईक यांनी ही माहिती दिली. लवकरच मुंबई–पुणे मार्गाबरोबरच महाराष्ट्रातील प्रमुख शहरांदरम्यानही शिवनेरी बस धावणार आहे.
सन 2002 मध्ये सुरू झालेल्या या सेवेने वेळेचे काटेकोर पालन, आरामदायी आसनव्यवस्था आणि सुरक्षित प्रवासामुळे प्रवाशांचा विश्वास मिळवला आहे. तिकीट दर इतर बसपेक्षा थोडे जास्त असले तरी प्रवाशांकडून चांगला प्रतिसाद मिळत असल्याने ही सेवा नफ्यात असल्याचे सांगण्यात आले.
या शहरात धावणार शिवनेरी
राज्यभर विस्तारासाठी 200 नवीन अत्याधुनिक व्होल्व्हो बसेस खरेदी करण्याची प्रक्रिया सुरू आहे. या बसेस ताफ्यात दाखल झाल्यानंतर नाशिक–पुणे, नाशिक–छत्रपती संभाजीनगर, नाशिक–जळगाव–धुळे, पुणे–कोल्हापूर, पुणे–सांगली, पुणे–सोलापूर, नागपूर–चंद्रपूर आणि नागपूर–अमरावती–अकोला अशा मार्गांवर सेवा सुरू करण्याचे नियोजन आहे. त्यामुळे विविध भागांतील प्रवाशांना सुरक्षित आणि सोयीस्कर प्रवासाचा पर्याय मिळणार आहे.
सध्या दादर–स्वारगेट, दादर–शिवाजीनगर, बोरीवली–स्वारगेट, बोरीवली–शिवाजीनगर, ठाणे–स्वारगेट आणि ठाणे–शिवाजीनगर या मार्गांवर ई-शिवनेरी बस सेवा सुरू असून तिला चांगला प्रतिसाद मिळत आहे. महिला प्रवासी तसेच 65 ते 75 वयोगटातील ज्येष्ठ नागरिकांना 50 टक्के सवलत, तर 75 वर्षांवरील नागरिकांना मोफत प्रवासाची सुविधा आहे.
नवीन 200 बसेसमध्ये 30 शयनयान बसेसचा समावेश असेल. दीर्घ पल्ल्याच्या प्रवासासाठी स्लिपर सुविधा उपलब्ध करून देण्याचा निर्णय घेण्यात आला आहे.
