नाशिक: नाशिकरोड परिसरात दोन अपघातात दोन जणांचा मृत्यू झाला असून त्यात एका परिचारिकेचा समावेश आहे. या प्रकरणी वेगवेगळ्या पोलीस ठाण्यात नोंद करण्यात आली आहे. नाशिक महानगरपालिकेच्या दसक येथील रुग्णालयात काम करणाऱ्या प्रिया पवार-जाधव (३४, रा. पाथर्डी गाव) या परिचारिका कामासाठी पाथर्डी गावातून रिक्षाने विहितगाव येथे जात असताना रिक्षा वडनेर गावाजवळ उलटली. यामुळे प्रिया रस्त्याच्या बाजूला फेकल्या गेल्या. त्यांच्या डोक्याला मार लागला.
तसेच चालक संजय पगारे हेही जखमी झाले. परिसरातील नागरिकांनी प्रिया यांना तातडीने रुग्णालयात दाखल केले. उपचारादरम्यान त्यांचा मृत्यू झाला. या प्रकरणी उपनगर पोलीस ठाण्यात गुन्हा दाखल करण्यात आला आहे.
तर दुसरा अपघात बिटको चौकात स्वातंत्र्यवीर सावरकर उड्डाणपुलावर झाला. गुलाम मुस्तफा शहा हे दुचाकीने उड्डाणपुलावरुन जात असताना मालवाहतूक वाहनाची धडक दुचाकीला बसली. धडक जोरात बसल्याने त्यांचा जागीच मृत्यू झाला. या अपघातानंतर काही काळ उड्डाणपुलावरील वाहतूक विस्कळीत झाली. नाशिकरोड पोलिसांनी घटनास्थळी धाव घेत अपघातग्रस्त वाहने बाजूला करुन वाहतूक सुरळीत केली. या प्रकरणी नाशिकरोड पोलीस ठाण्यात नोंद करण्यात आली आहे.
