नाशिक: नाशिकमधील एका नामांकित कंपनीत महिला कर्मचाऱ्यांच्या लैंगिक शोषणाचे जे प्रकरण समोर आले होते, त्याने आता अत्यंत भीषण वळण घेतले आहे. हे केवळ लैंगिक अत्याचाराचे प्रकरण नसून, त्यामागे ‘ह्युमन ट्रॅफिकिंग’ (मानवी तस्करी) आणि आंतरराष्ट्रीय फंडींगचे मोठे जाळे असल्याचे समोर येत आहे. एसआयटीच्या (SIT) तपासात मिळालेल्या माहितीनुसार, या पीडित तरुणींना मलेशियात विकण्याचा कट आरोपींनी आखला होता.
एका बड्या कंपनीतील वरिष्ठ पदावर असलेल्या अधिकाऱ्यांनी, कंपनीच्याच एका महिला ‘एचआर’ (HR) च्या मदतीने तरुणींना जाळ्यात ओढले. नोकरी टिकवणे, बढती देणे किंवा वैयक्तिक मदतीच्या बहाण्याने या तरुणींशी जवळीक साधली गेली. 2022 पासून सुरू असलेल्या या प्रकारात तरुणींचे शारीरिक शोषण करण्यात आले. याप्रकरणी आतापर्यंत 9 गुन्हे दाखल झाले असून 6 आरोपी गजाआड आहेत.
मलेशिया कनेक्शन आणि ‘फंडींग’चा अँगल
या प्रकरणातील सर्वात धक्कादायक बाब म्हणजे, पीडित तरुणींना मलेशियात पाठवण्यासाठी त्यांचे पासपोर्ट काढण्याची प्रक्रियाही सुरू झाली होती. व्हिडिओ कॉलद्वारे या व्यवहारांच्या चर्चा झाल्याचे पुरावे पोलिसांच्या हाती लागले आहेत. यात केवळ शोषण नाही, तर जबरदस्तीने धर्मांतर आणि या संपूर्ण रॅकेटसाठी होणारा परदेशी अर्थपुरवठा असे गंभीर पैलू समोर येत आहेत. यामुळेच आता हा तपास राष्ट्रीय सुरक्षेच्या दृष्टीनेही महत्त्वाचा ठरत आहे.
हे प्रकरण केवळ नाशिकपुरते मर्यादित नसून, एक मोठे संघटित गुन्हेगारी रॅकेट असल्याचे दिसत आहे. एसआयटी आता आरोपींच्या बँक खात्यांचा आणि कॉल रेकॉर्डचा सखोल तपास करत असून, लवकरच अधिक माहिती समोर येण्याची शक्यता आहे.
