नाशिक: राज्याचे सामाजिक न्याय मंत्री संजय शिरसाट (Sanjay Shirsat) यांनी निदा खान (Nida Khan) प्रकरणाबाबत गंभीर आरोप करत हे प्रकरण केवळ एका व्यक्तीपुरते मर्यादित नसल्याचा दावा केला आहे. या संपूर्ण प्रकरणामागे मोठे जाळे कार्यरत असल्याची शक्यता व्यक्त करत त्यांनी सखोल चौकशीची मागणी केली आहे. (Nashik News)
संजय शिरसाट यांनी माध्यमांशी बोलताना सांगितले की, निदा खान एकटीने हे सर्व काम केले असण्याची शक्यता कमी आहे. लोकांना आर्थिक मदत करणे, त्यांच्याशी संपर्क साधणे, धर्मांतरासाठी प्रवृत्त करणे आणि त्यानंतर त्यांच्या आयुष्यावर परिणाम करणाऱ्या घटना घडवून आणणे, अशा स्वरूपाचे संघटित रॅकेट या प्रकरणामागे असू शकते, असा त्यांचा दावा आहे.
तपासादरम्यान काही व्यक्तींनी निदा खानला आश्रय दिल्याचा आरोपही त्यांनी केला. या संदर्भात अटक करण्यात आलेल्या एका संशयिताच्या जबाबात काही महत्त्वाची माहिती समोर आल्याचे त्यांनी म्हटले आहे. या जबाबाच्या आधारे आणखी काही व्यक्तींची चौकशी होणे आवश्यक असल्याचे त्यांनी नमूद केले.
शिरसाट यांनी असेही म्हटले की, कोणत्याही आरोपीला आश्रय देणे किंवा त्याला मदत करणे हा कायद्याने गुन्हा मानला जातो. त्यामुळे या प्रकरणाशी संबंधित सर्व बाबींची चौकशी करून सत्य समोर आणले पाहिजे. तपास यंत्रणांनी कोणतीही व्यक्ती प्रभावशाली आहे म्हणून तिची गय करू नये, अशी अपेक्षाही त्यांनी व्यक्त केली.
दरम्यान, या प्रकरणाचा तपास विविध यंत्रणांकडून सुरू असून नाशिक आणि छत्रपती संभाजीनगर येथील पोलीसही तपासात सहभागी आहेत. प्रकरणाची व्याप्ती केवळ एका शहरापुरती मर्यादित नसून इतर ठिकाणांशीही त्याचे संबंध असण्याची शक्यता तपासली जात आहे.
या संपूर्ण प्रकरणातील सत्य समोर आणण्यासाठी तपास अधिक वेगाने सुरू असल्याचे शिरसाट यांनी सांगितले. तपास पूर्ण झाल्यानंतरच आरोपांमागील वस्तुस्थिती स्पष्ट होणार असून संबंधितांवर पुढील कायदेशीर कारवाई केली जाईल.
