अहमदनगर : अहमदनगरमधून एक खळबळजनक घटना समोर आली आहे. गेल्या अनेक वर्षांपासून एकत्र कुटूंबात राहणाऱ्या दिराने दारूच्या नशेत जबर मारहाण करून सख्खा भावजयीचा निर्घण खून केल्याची धक्कादायक घटना घडली आहे. ही घटना राहाता शहरातील १५ चारी हद्दीत घडली आहे. सविता लहानू पवार (वय-४०) असे खून झालेल्या महिलेचे नाव आहे. याप्रकरणी राहाता पोलिसांनी खुनाचा गुन्हा दाखल करून आरोपी बबन गोविंद पवार याला अवघ्या काही तासांच्या आत बेड्या ठोकल्या आहेत.
पोलिसांनी दिलेल्या माहितीनुसार, राहाता शहरातील १५ चारी हद्दीत प्रकाश जगताप यांच्या पेरूच्या शेतामध्ये आदिवासी समाजाचे पवार कुटुंबिय बाभळीची झाडे तोडून भट्टी लावून कोळसा बनविण्याचे काम करीत होते. पाथर्डी येथील ठेकेदार नारायण सोमा राठोड हे कामगार पुरवठादार आहेत. शुक्रवार आठवडे बाजार असल्याचे कारण देत बबन पवारसह इतरांनी पगाराची रक्कम घेतली. त्यानंतर रात्री दारूच्या नशेत बबन पवार याचे व मृत सविता पवार या दोघा दिर भावजयीमध्ये भांडण झाले.
या भांडणांमध्ये दिराने भावजयीच्या डोक्यासह कानशिलाजवळ जबर मारहाण केली. यामध्ये सविताचा मृत्यू झाला. दरम्यान, दुसऱ्या दिवशी (शनिवारी) सकाळी शेजारील व्यक्ती त्यांना उठविण्यासाठी आले असता सविता मृत अवस्थेत पडल्याचे आढळून आले. या घटनेची माहिती मिळताच पोलिसांनी घटनास्थळी धाव घेतली. तसेच तपासाची चक्रे फिरवित आरोपी बबन पवार याला काही तासांच्या आत ताब्यात घेतले. दरम्यान, सविताच्या डोक्यासह कानशिलाजवळ गंभीर इजा तर छातीवर जखमा झाल्याने तिचा मृत्यू झाल्याची प्राथमिक माहिती पोलिसांनी दिली आहे. पुढील तपास पोलिस निरीक्षक अरविंद जोंधळे करीत आहे.
