Crime News: नाशिक: मित्राच्या पत्नीबद्दल काढलेले चुकीचे उद्गार एका तरुणाच्या जिवावर बेतल्याची धक्कादायक घटना नाशिक जिल्ह्यातून समोर आली आहे. इगतपुरी तालुक्यातील वाडीवऱ्हे परिसरातील पिंपळगाव डुकरा येथे शुक्रवारी मध्यरात्री मैत्रीला काळिमा फासणारा हा प्रकार घडला. केवळ रागाच्या भरात एका मित्राने दुसऱ्या मित्राचा दगडाने ठेचून निर्घृण हत्या (Murder) केल्याने संपूर्ण परिसरात एकच खळबळ उडाली आहे. पोलिसांनी तातडीने कारवाई करत संशयित आरोपीला अवघ्या 2 तासांत अटक केली आहे.
पोलिसांनी दिलेल्या माहितीनुसार, अनिल एकनाथ गिन्हे हे आपल्या ओळखीच्या अजय रंगनाथ पवार याच्यासोबत होते. त्यावेळी अनिल याने अजयच्या पत्नीबद्दल अपशब्द वापरल्याचे सांगितले जात आहे. तसेच त्याच्या वागण्यामुळे अजय आणि त्याच्या पत्नीला मोठा राग आला. या प्रकाराची माहिती अजयची पत्नी काजल हिने आपल्या बहिणीला फोन करून दिली आणि परिस्थिती गंभीर होऊ शकते, असेही सांगितले.
दरम्यान, या घटनेनंतर अजय खूप संतापला होता. रागाच्या भरात त्याने अनिल याच्यावर दगडाने हल्ला केला. या हल्ल्यात अनिल गंभीर जखमी झाला आणि त्याचा जागीच मृत्यू झाला. काही वेळाने कुटुंबातील सदस्य घटनास्थळी पोहोचले असता अनिल रक्ताच्या थारोळ्यात पडलेला दिसून आला. हा प्रकार पाहून सर्वजण हादरले.
घटनेची माहिती मिळताच वाडीवऱ्हे पोलिसांनी तातडीने घटनास्थळी धाव घेतली. पोलिसांनी परिसरात शोधमोहीम सुरू करून संशयित अजय पवार याला अवघ्या 2 तासांत ताब्यात घेतले. या प्रकरणी खुनाचा गुन्हा दाखल करण्यात आला असून पुढील तपास सुरू आहे.
या घटनेमुळे स्थानिक नागरिकांमध्ये मोठी खळबळ उडाली असून, रागाच्या भरात घेतलेल्या निर्णयामुळे एकाचा जीव गेला आणि एकाचे आयुष्य उद्ध्वस्त झाले, अशी भावना व्यक्त केली जात आहे.
