नंदुरबार: नंदुरबार जिल्ह्यातील (Crime News) धडगाव तालुक्यात असलेल्या (Nandurbar News) तलाई येथील शासकीय आदिवासी आश्रम शाळेतून एक अतिशय धक्कादायक आणि संतापजनक घटना समोर आली आहे. शाळेच्या मुख्याध्यापकाने आठवीत शिकणाऱ्या एका अल्पवयीन विद्यार्थिनीवर बलात्कार केल्याचा गंभीर आरोप करण्यात आला असून या घटनेने संपूर्ण जिल्ह्यात मोठी खळबळ उडाली आहे. या प्रकरणी धडगाव पोलीस ठाण्यात मुख्याध्यापकासह वसतिगृह व्यवस्थापिकेवर देखील गुन्हा दाखल करण्यात आला आहे. (Latest Marathi News)
मिळालेल्या माहितीनुसार, तलाई येथील शासकीय आश्रम शाळेत शिकणाऱ्या एका 13 वर्षीय विद्यार्थिनीवर मुख्याध्यापक रायसिंग वसावे याने लैंगिक अत्याचार केले. इतकेच नाही तर हा प्रकार कोणाला सांगितल्यास जीवे मारण्याची धमकीही त्याने पीडितेने दिली होती. या नराधम मुख्याध्यापकाला वसतिगृहाची व्यवस्थापिका मालती पाडवी हिने मदत केल्याचा संशय व्यक्त केला जात आहे, त्यामुळे तिच्यावरही गुन्हा नोंदवण्यात आला आहे. हा सर्व प्रकार पीडित मुलीने हिंमत एकवटून आपल्या आई-वडिलांना सांगितल्यानंतर उघडकीस आला. आपल्या मुलीसोबत झालेला हा भयानक प्रकार ऐकून पालकांनी तातडीने पोलिसांत धाव घेतली.
या घटनेची माहिती मिळताच आदिवासी संघटनांनी आक्रमक पवित्रा घेतला असून आरोपींवर कठोर कारवाई करण्याची मागणी केली आहे. आश्रम शाळांसारख्या सुरक्षित मानल्या जाणाऱ्या ठिकाणी अशा घटना घडत असल्याने पालकांमध्ये भीतीचे वातावरण आहे. धडगाव पोलिसांनी या प्रकरणी भारतीय न्याय संहिता आणि पोक्सो कायद्याच्या विविध कलमांनुसार गुन्हा दाखल केला असून पुढील तपास वेगाने सुरू केला आहे. आश्रम शाळांमधील मुलींच्या सुरक्षिततेचा प्रश्न या घटनेमुळे पुन्हा एकदा गंभीरपणे समोर आला आहे.
प्रशासनाकडून अशा नराधम कर्मचाऱ्यांवर तात्काळ निलंबनाची आणि कायदेशीर कारवाईची मागणी होत आहे. पोलिसांनी दिलेल्या माहितीनुसार, आरोपींचा शोध घेण्यासाठी पथके रवाना करण्यात आली असून लवकरच त्यांना अटक केली जाईल. या घटनेमुळे शैक्षणिक क्षेत्रातूनही तीव्र निषेध व्यक्त केला जात आहे.
