नाशिक: नाशिकमध्ये कथित ज्योतिषी ‘कॅप्टन’ अशोक खरात (Ashok Kharat Case) प्रकरणात नवे धक्कादायक तपशील समोर येत असतानाच या प्रकरणात दुसरी मोठी अटक (Nashik News) करण्यात आली आहे. खरातसोबत काम करणारा नीरज जाधव याला पोलिसांनी ताब्यात घेतले असून, या अटकेमुळे संपूर्ण प्रकरणाची व्याप्ती आणखी वाढली आहे. (Latest Marathi News)
मिळालेल्या माहितीनुसार, नीरज जाधव याच्यावर एका महिलेचे आक्षेपार्ह फोटो आणि व्हिडिओ तयार करून ते दाखवण्याचा आणि पाठवण्याचा गंभीर आरोप आहे. संबंधित महिलेने दिलेल्या तक्रारीनुसार, ती शिर्डी येथे साईबाबांच्या दर्शनासाठी रांगेत उभी असताना नीरज जाधव तिच्याकडे आला आणि मोबाईलमधील तिचे कथित आक्षेपार्ह फोटो दाखवले. हे फोटो पाहून ती हादरली. या प्रकारामुळे ती पुन्हा मानसिक दबावाखाली गेल्याची माहिती आहे.
या प्रकरणात 18 फेब्रुवारी रोजी शिर्डी पोलीस ठाण्यात गुन्हा दाखल झाला होता. नीरज जाधवने पीडित महिलेचे मोर्फ केलेले अश्लील व्हिडिओचे स्क्रीनशॉट पाठवले होते, असा आरोप आहे. या माध्यमातून महिलांना ब्लॅकमेल करून त्यांना जाळ्यात ओढण्याची पद्धत वापरली जात असल्याचा संशय तपास यंत्रणांना आहे.
या संपूर्ण प्रकरणाचा तपास विशेष तपास पथकाकडे (SIT) सोपवण्यात आला असून, त्याचे नेतृत्व तेजस्वीनी सातपुते करत आहेत. तपासात आणखी आरोपी आणि पीडित समोर येण्याची शक्यता व्यक्त केली जात आहे. दरम्यान, या प्रकरणात राज्य पातळीवरही हालचाली वेगाने सुरू झाल्या आहेत. भोंदूगिरीच्या आडून चालणाऱ्या अशा प्रकारांवर कठोर कारवाई करण्याचे निर्देश आधीच देण्यात आले होते. त्यानुसार पोलिसांनी गोपनीयपणे पुरावे गोळा करत कारवाई केली.
