नाशिक: नाशिकमध्ये स्वतःला ज्योतिषी आणि ‘कॅप्टन’ म्हणून ओळख निर्माण (Ashok Kharat) करणाऱ्या अशोक खरात प्रकरणाने राज्यात मोठी खळबळ उडवली आहे. नाशिक क्राइम ब्रँचने त्याला बलात्काराच्या आरोपाखाली अटक केली असून तपासात समोर येत असलेल्या माहितीमुळे या प्रकरणाचे गांभीर्य अधिक वाढले आहे. (Latest Marathi News)
मिळालेल्या माहितीनुसार, अशोक खरात महिलांना भविष्य सांगण्याच्या नावाखाली कॅनडा कॉर्नर येथील आपल्या कार्यालयात बोलवत असे. विश्वासात घेतल्यानंतर तो महिलांशी अश्लील वर्तन करत असल्याचे आरोप आहेत. काही महिलांवर मानसिक दबाव टाकून त्यांचे लैंगिक शोषण करण्यात आले, तर काही महिलांना त्याने आपल्या केबिनमध्ये बोलावून स्वतःची लघवी प्यायला भाग पाडले. अशीही माहिती तपासातून समोर येत आहे. या प्रकरणातील तपशील अत्यंत धक्कादायक असल्याने पोलिस अधिक तपास करत आहेत.
या प्रकरणात सर्वाधिक गंभीर बाब म्हणजे पोलिसांनी हस्तगत केलेल्या डिजिटल पुराव्यांमधून अनेक महिलांचे आक्षेपार्ह व्हिडिओ सापडल्याची माहिती आहे. त्यामुळे हा प्रकार केवळ एका घटनेपुरता मर्यादित नसून दीर्घकाळ चाललेल्या शोषणाच्या साखळीचा भाग असू शकतो, अशी शक्यता व्यक्त केली जात आहे. पुढील काही दिवसांत आणखी पीडित महिला पुढे येण्याची शक्यता आहे.
या प्रकरणाला राजकीय आणि सामाजिक पातळीवरही वेगळे परिमाण मिळाले आहे. सिन्नर तालुक्यातील ‘श्री शिवनिका संस्थान’ या मंदिराशी अशोक खरात संबंधित होता आणि या ट्रस्टशी रूपाली चाकणकर यांचे नाव जोडले गेले आहे. तसेच काही प्रभावशाली व्यक्ती या ठिकाणी येत असल्याची माहिती समोर आल्याने चर्चेला अधिक उधाण आले आहे.
