जालना: राज्य सरकारला दिलेला वेळ संपल्यानंतर बुधवारी पुन्हा मनोज जरांगे यांनी आक्रमक होत आंदोलन सुरू केलं. मात्र, छत्रपती संभाजीराजेंनी मागणी केली आणि मनोज जरांगे हे आजचा दिवस पाणी प्यायले. छत्रपती संभाजीराजे यांचा आदर आणि सन्मान म्हणून फक्त आजच्या दिवसासाठी पाणी घेणार, पण उद्यापासून पुन्हा आंदोलन सुरू करणार असा इशारा मनोज जरांगे यांनी दिला.
जालन्यात आजपासून मनोज जरांगे यांनी सुरू केलेल्या उपोषणाला पाठिंबा देण्यासाठी छत्रपती संभाजी राजे यांनी उपोषण स्थळी जाऊन मनोज जरांगे यांची भेट घेतली. यावेळी छत्रपती संभाजीराजे यांनी शिवरायांचे वंशज म्हणून मनोज जरांगे यांना तब्येतीची काळजी घेत पाणी घेऊन आमरण उपोषण करण्याची विनंती केली. यावेळी जरांगे यांनी आजचा दिवस पाणी पिऊन आपण छत्रपती संभाजी राजे यांचा शब्द मोडत नसल्याच सांगिंतलं. आज पाणी घेतलं आहे, मात्र उद्यापासून आपण पाणीही घेणार नसल्याचं मनोज जरांगे यांनी स्पष्ट केलं.
दरम्यान मराठा समाजाला 40 दिवसांच्या मुदतीत राज्य सरकारने आरक्षण न दिल्याने आता पुन्हा एकदा मनोज जरांगे उपोषणाला बसलेत. जरांगे यांनी आंतरवाली सराटीत सकाळपासून आंदोलनाला सुरूवात केली. अन्नपाणी, उपचार घेणार नाही आणि सलाईनही लाऊ देणार नाही, असा निर्धार यावेळी जरांगे यांनी केला आहे. तसेच मराठा समाजाला ओबीसी प्रवर्गात आरक्षण मिळेल ही आशा फोल ठरली, असं ते म्हणाले. राज्य सरकार मराठा समाजाची दिशाभूल करत आहे, असा आरोप त्यांनी यावेळी केला. दरम्यान, कोणीही हिंसक आंदोलन, कुठेही जाळपोळ तसेच आत्महत्या करू नका असं आवाहनही मनोज जरांगेंनी केलं
