बीड: बीड जिल्ह्यातील परळी येथे दोन वर्षांपूर्वी घडलेल्या (Mahadev Munde Murder) व्यापारी महादेव मुंडे यांच्या हत्येप्रकरणी तपासाला पुन्हा वेग आला असून काही (Walmik Karad) महत्त्वाच्या घडामोडी समोर येत आहेत. या प्रकरणात सुरुवातीपासूनच अनेक संशय व्यक्त होत होते. आता मृत महादेव मुंडे यांच्या पत्नी ज्ञानेश्वरी मुंडे यांनी तपासाबाबत गंभीर प्रश्न उपस्थित करत सरकारवर थेट नाराजी व्यक्त केली आहे. (Beed News)
महादेव मुंडे यांची हत्या झाल्यानंतर शहरात तीव्र संतापाची लाट उसळली होती. व्यापारी संघटना आणि स्थानिक नागरिकांनी आरोपींना तातडीने अटक करण्याची मागणी केली होती. त्यानंतर राज्य सरकारने विशेष तपास पथकाची स्थापना केली. मात्र दोन वर्षे उलटूनही गुन्ह्यातील मुख्य सूत्रधार आणि आरोपी निश्चित करण्यात यश आले नसल्याचा आरोप कुटुंबीयांनी केला आहे.
ज्ञानेश्वरी मुंडे यांनी मुख्यमंत्री देवेंद्र फडणवीस यांची भेट घेऊन एसआयटीमार्फत सखोल आणि निष्पक्ष तपास व्हावा, अशी मागणी केली होती. त्यांनी काही पोलीस अधिकाऱ्यांवरही निष्क्रियतेचे आरोप केले आहेत. त्यांच्या मते, एका फोननंतर तपास काही काळ थांबवण्यात आला आणि त्यामुळे आरोपींना वेळ मिळाला.
सध्या तपास अंतिम टप्प्यात असल्याचे सांगितले जात असून काही संशयितांची ब्रेन मॅपिंग आणि नार्को चाचणी करण्यात येत आहे. कराड येथील एका बंगल्यावर नोकर म्हणून काम करणाऱ्या संशयितांवर या चाचण्या करण्यात आल्या असून त्यातून काही महत्त्वाची माहिती समोर येण्याची शक्यता व्यक्त केली जात आहे.
दरम्यान, गोटया गीते नावाचा मुख्य संशयित अद्याप फरार असून पोलिस त्याचा शोध घेत आहेत. त्याचा तपासात महत्त्वाचा दुवा असल्याचे मानले जात आहे.
दोन वर्षांनंतरही स्पष्ट निष्कर्ष न लागल्याने परळीतील नागरिकांमध्ये अस्वस्थता आहे. आता तपासाला वेग मिळाल्याने लवकरच हत्येमागील कट उघड होईल आणि दोषींना शिक्षा मिळेल, अशी अपेक्षा मुंडे कुटुंबीय आणि स्थानिक नागरिक व्यक्त करत आहेत.
