Crime News: लातूर : लातूर जिल्ह्यातील अहमदपूर शहरात पूर्ववैमनस्यातून एका 26 वर्षीय तरुणाची चाकू व काठीने वार करून निर्घृण हत्या करण्यात आल्याची खळबळजनक घटना घडली आहे. या घटनेमुळे परिसरात भीतीचे वातावरण निर्माण झाले आहे. याप्रकरणी अहमदपूर पोलीस ठाण्यात सहा जणांविरुद्ध भारतीय न्याय संहिता 2023 अंतर्गत हत्येचा गुन्हा दाखल करण्यात आला आहे. यातील दोन आरोपी जखमी अवस्थेत रुग्णालयात उपचार घेत असून, चार आरोपी फरार आहेत. फरार आरोपींच्या शोधासाठी पोलिसांची विशेष पथके रवाना करण्यात आली आहेत.
मयत तरुणाचे नाव शोएब इसाक बागवान वय 26, रा. बागवान गल्ली, अहमदपूर असे आहे. या प्रकरणात उमेर खाजामौनोदीन बागवान यांनी फिर्याद दिली आहे. फिर्यादी उमेर बागवान आणि शोएब बागवान हे रात्री सुमारे 9 वाजेच्या सुमारास अहमदपूर येथील अबुबकर किराणा दुकानाजवळ थांबून बोलत होते. यावेळी मागील वादाची कुरापत काढून सहा जणांनी एकत्र येत त्यांच्यावर अचानक हल्ला केला.
आरोपींनी जीवे मारण्याच्या उद्देशाने चाकू आणि काठीने बेदम मारहाण केली. या हल्ल्यात शोएब बागवान गंभीर जखमी झाला. त्याला तातडीने रुग्णालयात नेण्याचा प्रयत्न करण्यात आला, मात्र त्याचा घटनास्थळीच मृत्यू झाला. या घटनेनंतर परिसरात एकच खळबळ उडाली असून नागरिकांमध्ये संतापाची भावना आहे.
या प्रकरणी पोलिसांनी सिकंदर खलील शेख, समीर खलील शेख, आमीर खलील शेख, कलीम खलील शेख, गणीबी शेख आणि मालन बबलू शेख या सहा जणांविरुद्ध गुन्हा दाखल केला आहे. सर्व आरोपी अहमदपूर शहरातील रहिवासी आहेत. यापैकी दोन आरोपी जखमी असल्याने रुग्णालयात उपचार घेत आहेत, तर चार आरोपी फरार आहेत.
अहमदपूर पोलीस ठाण्यात गुन्हा रजि. नं. 830/2025 अन्वये भारतीय न्याय संहिता 2023 चे कलम 103(1), 118(2), 189(2), 191(2), 191(3), 190, 351(2)(3) आणि 352 अंतर्गत गुन्हा दाखल करण्यात आला आहे. पोलिसांकडून पुढील तपास सुरू असून फरार आरोपींचा शोध वेगाने घेतला जात आहे.
