Crime News: छत्रपती संभाजीनगर : प्रेमावर विश्वास ठेवलेल्या एका 20 वर्षीय तरुणीचा तो विश्वासच तिच्यासाठी भीतीचे कारण ठरला. प्रेमसंबंधांचा गैरफायदा घेत एका तरुणाने तिच्यावर वारंवार जबरदस्तीने शारीरिक अत्याचार केले, मारहाण केली आणि लग्नासाठी दबाव टाकत मानसिक छळ केल्याचा गंभीर प्रकार समोर आला आहे. लग्नास नकार दिल्यानंतर आरोपीने तिचे फोटो व्हायरल करण्याची तसेच जिवे मारण्याची धमकी दिल्याने तरुणीचे आयुष्य असुरक्षित झाले. अखेर पीडित तरुणीने धैर्य एकवटत पोलिसांकडे धाव घेतली असून या प्रकरणी लोहरा पोलिस ठाण्यात गुन्हा दाखल करण्यात आला आहे. पुढील तपासासाठी हा गुन्हा शुक्रवारी वाळूज एमआयडीसी पोलिस ठाण्याकडे वर्ग करण्यात आला आहे.
पीडित तरुणीच्या तक्रारीनुसार, सन 2023 मध्ये ती एका खासगी कंपनीत नोकरी करत होती. याच काळात तिची ओळख नितीन (वय 24, रा. एमआयडीसी परिसर) या कंपनीतील सुपरवायझरशी झाली. ओळखीचे पुढे प्रेमसंबंधात रूपांतर झाले. या नात्याचा गैरफायदा घेत आरोपीने ऑगस्ट 2024 मध्ये तिला रांजणगाव येथील शिवनेरी कॉलनीतील आपल्या राहत्या घरी राहण्यासाठी नेले. त्या ठिकाणी त्याने तिच्यावर अनेकदा जबरदस्तीने शारीरिक अत्याचार केल्याचा आरोप आहे.
तसेच मद्यपान करून आरोपी तरुणीला मारहाण करत होता आणि सतत लग्नासाठी दबाव टाकत होता. तरुणीने लग्नास नकार दिल्यानंतर तिचा छळ अधिक वाढल्याचे तक्रारीत नमूद करण्यात आले आहे. 31 जुलै ते 1 ऑगस्ट 2025 या कालावधीत तिला एका खोलीत कोंडून ठेवल्याचाही आरोप आहे. भीतीच्या वातावरणात संधी साधत पीडित तरुणी 3 ऑगस्ट रोजी तेथून निसटली आणि 4 ऑगस्ट रोजी यवतमाळ येथील आपल्या घरी पोहोचली.
यानंतरही आरोपीने फोनवरून तिला फोटो व्हायरल करण्याची आणि खून करण्याची धमकी दिल्याचे तरुणीने तक्रारीत सांगितले आहे. सततच्या त्रासामुळे मानसिकदृष्ट्या खचलेल्या तरुणीने अखेर पोलिसांत तक्रार दाखल केली. सध्या या गंभीर प्रकरणाचा पुढील तपास पोलिसांकडून सुरू आहे.
