Chhatrapati Sambhajinagar: छत्रपती संभाजीनगर : छत्रपती संभाजीनगर शहरात कर्तव्य बजावत असलेल्या वाहतूक पोलीस कर्मचाऱ्याला मद्यधुंद व्यक्ती आणि त्याच्या पत्नीने मारहाण (Traffic policeman beaten) केल्याची धक्कादायक घटना समोर आली आहे. ही घटना शहरातील हायकोर्ट सिग्नल येथे घडली. या प्रकरणी सोमनाथ मुरलीधर गिरी आणि त्याच्या पत्नीविरुद्ध पोलिसांनी गुन्हा दाखल केला असून पुढील तपास सुरू आहे. या घटनेचा व्हिडिओ सोशल मीडियावर व्हायरल होत आहे. (Chhatrapati Sambhajinagar Crime News)
वाहतूक पोलिस कर्मचारी संतोष खरात हे नेहमीप्रमाणे हायकोर्ट सिग्नलवर आपले कर्तव्य पार पाडत होते. त्याच वेळी सोमनाथ गिरी हा दुचाकीवरून धोकादायक पद्धतीने वाहन चालवत होता. तो डिव्हायडरच्या अगदी जवळून जात असल्यामुळे पोलिसांनी त्याला थांबवले. त्यावेळी तो मद्यधुंद अवस्थेत असल्याचे पोलिसांच्या लक्षात आले. पोलिसांनी त्याच्याकडे चौकशी केली असता, त्याने वाद घालण्यास सुरुवात केली आणि शिवीगाळ केली. तसेच पोलिसांना धमकीही दिली.
वाद वाढत असताना सोमनाथ गिरीने आपल्या पत्नीला घटनास्थळी बोलावले. त्यानंतर दोघांनी मिळून पोलिस कर्मचाऱ्याशी वाद घातला. या दरम्यान त्यांनी पोलिस कर्मचारी संतोष खरात यांना चापट मारली आणि धक्काबुक्की केली. एवढेच नाही तर सोमनाथ गिरी हा भर रस्त्यात जाऊन झोपला, त्यामुळे काही वेळ वाहतूक विस्कळीत झाली आणि नागरिकांनाही त्रास सहन करावा लागला.
घटनास्थळी उपस्थित नागरिक आणि इतर पोलिसांनी त्यांना समजावण्याचा प्रयत्न केला. मात्र ते शांत होण्यास तयार नव्हते. अखेर नियंत्रण कक्षाला माहिती देण्यात आली. त्यानंतर पुंडलिकनगर पोलिस ठाण्याचे कर्मचारी आणि दामिनी पथक घटनास्थळी दाखल झाले. त्यांनी या दोघांना ताब्यात घेऊन पोलिस ठाण्यात नेले.
या प्रकरणी सरकारी कामात अडथळा आणणे, पोलिसांना मारहाण करणे आणि वाहतुकीत अडथळा निर्माण करणे या आरोपांखाली गुन्हा दाखल करण्यात आला आहे. या घटनेमुळे परिसरात संताप व्यक्त केला जात असून, पोलिस पुढील तपास करत आहेत.
