Pune Crime : पिंपरी-चिंचवड : पिंपरी-चिंचवड शहरातील हिंजवडी पोलीस ठाण्याच्या हद्दीत असलेल्या जांबे गावात एका 77 वर्षीय शेतकऱ्याने आपल्या शेतात बेकायदेशीरपणे अफूची लागवड केल्याचा धक्कादायक प्रकार समोर आला आहे. या प्रकरणी पिंपरी-चिंचवड पोलिसांच्या गुंडा विरोधी पथकाने कारवाई करत संबंधित शेतकऱ्याला अटक केली आहे. या घटनेमुळे परिसरात मोठी खळबळ उडाली आहे.
संपत बाबूराव दर्शिले (वय 77) असे अटक करण्यात आलेल्या शेतकऱ्याचे नाव आहे. ते जांबे गावातील रसिकवाडी परिसरात राहतात. त्यांच्या शेताच्या परिसरात त्यांनी कोणतीही परवानगी न घेता अफूच्या झाडांची लागवड केली होती. हे शेत रस्त्याच्या कडेला आणि शालीमकर स्पोर्ट्स एरिना जवळ असल्याने ही बाब अधिक गंभीर मानली जात आहे.
पोलिसांच्या गुंडा विरोधी पथकाला या बेकायदेशीर लागवडीबाबत गुप्त माहिती मिळाली होती. या माहितीच्या आधारे सहायक पोलीस निरीक्षक विक्रम जगदाळे आणि त्यांच्या पथकाने 20 फेब्रुवारी रोजी सायंकाळी सुमारे 6 वाजता शेतावर छापा टाकला. तपासादरम्यान शेतात अफूची हिरवीगार झाडे आढळून आली. पोलिसांनी तात्काळ कारवाई करत सुमारे 16 किलो 810 ग्रॅम वजनाची अफूची झाडे जप्त केली.
विनापरवाना अफूची लागवड करणे हा कायद्याने गंभीर गुन्हा आहे. त्यामुळे पोलिसांनी सर्व झाडे जप्त करून शेतकऱ्याला ताब्यात घेतले. या प्रकरणी हिंजवडी पोलीस ठाणे येथे अंमली पदार्थ विरोधी कायद्यांतर्गत गुन्हा दाखल करण्यात आला आहे.
भरवस्तीत आणि रस्त्यालगत अशा प्रकारे अफूची लागवड केल्याचे उघड झाल्याने नागरिकांमध्ये चिंता व्यक्त केली जात आहे. ही अफू कोणाला विकली जाणार होती आणि यामागे आणखी कोणी सहभागी आहे का, याचा तपास पोलीस करत आहेत. या कारवाईमुळे परिसरात बेकायदेशीर काम करणाऱ्यांमध्ये भीतीचे वातावरण निर्माण झाले आहे.
