बीड: नीट पेपरफुटी प्रकरणाच्या (NEET Paper Leak) तपासात आता बीड आणि लातूर कनेक्शन अधिक चर्चेत आले आहे. अंबाजोगाई येथील दोन विद्यार्थ्यांची आणि त्यांच्या शिक्षिका आईची केंद्रीय अन्वेषण विभागाने चौकशी केल्याची माहिती समोर आल्याने या प्रकरणात खळबळ उडाली आहे. तपासाची व्याप्ती वाढत असून आणखी धागेदोरे समोर येण्याची शक्यता व्यक्त केली जात आहे.
मिळालेल्या माहितीनुसार, चौकशी करण्यात आलेले दोन्ही विद्यार्थी बहीण-भाऊ असून ते लातूरमध्ये शिक्षण घेत होते. यापैकी बहीण रिपीटर विद्यार्थीनी होती आणि ती पुन्हा NEET परीक्षा देत होती, तर भाऊ पहिल्यांदाच परीक्षेला बसला होता. या दोघांसह त्यांच्या शिक्षिका आईचीही सविस्तर चौकशी करण्यात आल्याचे सांगितले जात आहे. त्यामुळे तपासाचा फोकस केवळ विद्यार्थ्यांपुरता मर्यादित नसून संबंधित शैक्षणिक नेटवर्कपर्यंत पोहोचत असल्याचे दिसत आहे.
दरम्यान, या प्रकरणात शिवराज मोटेगावकर यांचे नाव पुन्हा चर्चेत आले आहे. बीडमधील एका शिक्षक संघटनेच्या लेटरहेडवर मोटेगावकर यांचा ‘ब्रँड अँबेसिडर’ म्हणून उल्लेख असल्याची माहिती समोर आली आहे. त्यामुळे त्यांच्याशी संबंधित शैक्षणिक नेटवर्क आणि कोचिंग साखळीबाबत संशय अधिक गडद झाला आहे.
लातूरमधील RCC कोचिंग क्लासेसही या तपासामुळे चर्चेत आहेत. संस्थेचे मुख्य संचालक म्हणून ओळखले जाणारे शिवराज मोटेगावकर सध्या CBI च्या ताब्यात असल्याची माहिती आहे. या पार्श्वभूमीवर विद्यार्थ्यांचे शैक्षणिक नुकसान टाळण्यासाठी संस्थेकडून सराव परीक्षांचे आयोजन करण्यात येत आहे.
NEET परीक्षा पुन्हा होणार असल्याच्या चर्चेमुळे विद्यार्थी आणि पालकांमध्ये संभ्रम आणि चिंता वाढली आहे. त्यामुळे विद्यार्थ्यांची तयारी खंडित होऊ नये आणि त्यांचा आत्मविश्वास टिकून राहावा यासाठी कोचिंग संस्थांकडून सराव परीक्षा घेतल्या जात असल्याचे सांगितले जात आहे.
या संपूर्ण प्रकरणामुळे राज्यातील खासगी कोचिंग संस्था, शैक्षणिक नेटवर्क आणि परीक्षा व्यवस्थेवर पुन्हा प्रश्नचिन्ह निर्माण झाले आहे. CBI कडून या प्रकरणाचा पुढील तपास सुरू आहे.
