बीड : बीड जिल्ह्यातील अंबाजोगाई शहरातून एक अत्यंत संतापजनक घटना समोर आली आहे. शहरातील क्रांतीनगर परिसरात दहा वर्षीय अल्पवयीन मुलीला चॉकलेटचे आमिष दाखवून तिच्याशी गैरवर्तन करण्यात आल्याचा गंभीर प्रकार उघडकीस आला आहे. याप्रकरणी पीडित मुलीच्या आईने दिलेल्या तक्रारीवरून अंबाजोगाई शहर पोलीस ठाण्यात चार जणांविरोधात कायदेशीर गुन्हा दाखल करण्यात आला आहे.
मिळालेल्या माहितीनुसार, क्रांतीनगर परिसरात राहणारी दहा वर्षीय मुलगी घरासमोरील रस्त्यावर खेळत असताना, शोएब अजीज पठाण नावाचा व्यक्ती तिच्याजवळ आला. त्याने मुलीला चॉकलेट देण्याचे सांगून तिच्याशी जवळीक साधली आणि नंतर तिच्याशी गैरवर्तन केले. घडलेला हा प्रकार कोणालाही सांगितल्यास गंभीर परिणाम भुोगावे लागतील, अशी धमकीही आरोपीने अल्पवयीन मुलीला दिली होती.
मात्र, घाबरलेल्या मुलीने घरी परतल्यानंतर घडलेला सर्व घटनाक्रम आपल्या आईला सांगितला. त्यानंतर कुटुंबीयांनी तात्काळ अंबाजोगाई शहर पोलीस ठाण्यात धाव घेत तक्रार नोंदवली. या प्रकरणात मुख्य आरोपी शोएब अजीज पठाण याच्यासह बिल्कीस अजीज पठाण, जकीया मेहबूब शेख आणि जाफर मेहबूब शेख या अन्य तिघांचाही सहभाग असल्याचा आरोप फिर्यादीत करण्यात आला आहे.
घटनेचे गांभीर्य लक्षात घेऊन पोलिसांनी चौघांविरुद्ध गुन्हा दाखल केला असून, सध्या या प्रकरणाचा सखोल तपास सुरू आहे. अल्पवयीन मुलीचा जबाब, वैद्यकीय अहवाल आणि उपलब्ध पुरावे तपासात अत्यंत महत्त्वाचे ठरणार आहेत. या संतापजनक प्रकारामुळे क्रांतीनगर परिसर आणि शहरात तीव्र संताप तसेच चिंतेचे वातावरण निर्माण झाले आहे. लहान मुलांच्या सुरक्षिततेसाठी पालकांनी त्यांच्या हालचालींवर विशेष लक्ष ठेवावे, तसेच कोणतीही संशयास्पद किंवा अनुचित घटना घडल्यास न घाबरता तात्काळ पोलिसांशी संपर्क साधावा, असे आवाहन प्रशासनाकडून करण्यात आले आहे.
