पुणे : श्रीमंत दगडूशेठ हलवाई गणपती मंडळातर्फे १५ सप्टेंबर रोजी आयोजित करण्यात आलेल्या अथर्वशीर्ष पठणाच्या कार्यक्रमाच्या पार्श्वभूमीवर पुणे शहर वाहतूक पोलिसांनी मध्यवर्ती भागातील वाहतुकीत तात्पुरते बदल केले आहेत. हा धार्मिक कार्यक्रम पहाटे ५ वाजता सुरू होणार असून, यासाठी मोठ्या संख्येने महिला भाविक सहभागी होण्याची शक्यता आहे. त्यामुळे वाहतूक कोंडी टाळण्यासाठी काही प्रमुख रस्ते वाहतुकीसाठी बंद ठेवण्यात येणार आहेत.
वाहतूक शाखेचे पोलीस उपायुक्त डॉ. संदीप भाजीभाकरे यांनी याबाबत आदेश दिले आहेत. ही वाहतूक व्यवस्था १५ सप्टेंबर रोजी पहाटे ५ वाजल्यापासून अथर्वशीर्ष पठणाचा कार्यक्रम संपेपर्यंत लागू राहणार आहे. रुग्णवाहिका, अग्निशमन दलाची वाहने तसेच पोलीस वाहनांसारख्या अत्यावश्यक सेवांच्या वाहनांना या निर्बंधातून वगळण्यात आले आहे.
छत्रपती शिवाजी महाराज रोडवरील जिजामाता चौक ते रामेश्वर मंदिर चौक हा मार्ग वाहतुकीसाठी बंद राहणार आहे. या मार्गावरील वाहनचालकांनी गाडगीळ पुतळा-जिजामाता चौकातून डावीकडे वळून गणेश रोड, फडके हौद चौक, देवजीबाबा चौक, हमजेखान चौक, महाराणा प्रताप मार्ग, गोविंद हलवाई चौक आणि गोटीराम भैय्या चौकमार्गे शिवाजी रोडने स्वारगेटच्या दिशेने जावे.
याशिवाय अप्पा बळवंत चौक ते बुधवार चौक हा मार्गही बंद ठेवण्यात येणार आहे. या मार्गावरील वाहतूक अप्पा बळवंत चौकातून बाजीराव रोड, फुटका बुरुज, गाडगीळ पुतळा चौक आणि जिजामाता चौकमार्गे वळविण्यात येणार आहे.
गरज भासल्यास लक्ष्मी रोडवरील विजय मारुती चौक आणि सोन्या मारुती चौकातूनही वाहतूक वळविण्यात येणार आहे. सोन्या मारुती चौकातून वाहनचालकांनी डावीकडे वळून मिर्झा गालिब रोड जंक्शन, तेथून उजवीकडे मंडई आणि पुढे शिवाजी रोडमार्गे स्वारगेटकडे जावे.
भाविकांची मोठी गर्दी लक्षात घेता वाहनचालकांनी शक्यतो पर्यायी मार्गांचा वापर करावा आणि वाहतूक पोलिसांना सहकार्य करावे, असे आवाहन करण्यात आले आहे.
