रायगड: रायगड जिल्ह्यामध्ये रिक्षा आणि शिवशाही बसचा अपघात झाला असून यामध्ये तीन जणांचा मृत्यू झाला आहे. मुंबई -गोवा महामार्गावर माणगाव येथे हा अपघात झाला आहे. ठाणे येथून सुटलेली शिवशाही बस ही दापोलीला जात असताना माणगाव येथे आली असता हा अपघात झाला. दरम्यान या अपघाताची माहिती मिळताच माणगाव पोलिसांनी घटनास्थळी धाव घेतली. हा अपघात इतका भीषण होता की अपघातग्रस्त रिक्षाचा अक्षरशः चुराडा झाला आहे. शिवशाही बसचे देखील नुकसान झाले आहे.
या अपघाताबद्दल अधिक माहिती अशी की, मुंबई-गोवा महामार्गावर रायगड जिल्ह्यामधील माणगाव जवळ शिवशाही बस आणि रिक्षामध्ये अपघात झाला. यामध्ये रिक्षातील तीन प्रवाशांचा मृत्यू झाला आहे. ठाण्यावरून दापोलीला जाणारी शिवशाही बस माणगाव येथील मानस हॉटेल समोर आली असता रिक्षा आणि या शिवशाहीमध्ये अपघात झाला. रविवारी सकाळी साडे आकरा वाजेच्या सुमारास हा अपघात झाला.
या अपघातामध्ये रिक्षातुन प्रवास करत असलेले दत्तात्रय वरणदेकर, प्रवीण मालसुरे व आणखी एका प्रवाशाचा मृत्यू झाला आहे. या अपघाताचे नेमकं कारण अद्याप समजू शकलेले नाही.
