मुंबई : मुख्यमंत्री माझी लाडकी बहीण योजनेच्या पात्र लाभार्थी महिलांसाठी दिलासादायक बातमी आहे. जुलै महिन्याच्या हप्त्याची १,५०० रुपयांची रक्कम पात्र महिलांच्या बँक खात्यात जमा होण्यास सुरुवात झाली आहे. ही रक्कम टप्प्याटप्प्याने लाभार्थी महिलांच्या खात्यावर जमा केली जाणार आहे.
महिला व बालविकास मंत्री आदिती तटकरे यांनी रक्षाबंधनाच्या पूर्वसंध्येला पात्र लाभार्थी महिलांच्या खात्यात जुलै महिन्याचा हप्ता जमा केला जाईल, असे सांगितले होते. त्यानुसार या हप्त्याच्या वितरणाची प्रक्रिया सुरू करण्यात आली आहे.
योजनेच्या पडताळणीनंतर राज्यात १ कोटी ६६ लाख महिला लाभासाठी पात्र ठरल्या आहेत. या पात्र महिलांना दरमहा १,५०० रुपयांचा लाभ दिला जातो.
दरम्यान, अनुसूचित जाती घटकातील पात्र लाभार्थी महिलांना जुलै महिन्याचा हप्ता देण्यासाठी राज्य सरकारने ३१९ कोटी ५३ लाख रुपयांचा निधी महिला व बालविकास विभागाकडे वर्ग केला आहे. यंदाच्या आर्थिक वर्षात या योजनेच्या अनुसूचित जाती घटकासाठी ३ हजार कोटी रुपयांचा निधी मंजूर करण्यात आला आहे.
पात्र लाभार्थी महिलांच्या खात्यावर पैसे जमा होण्याची प्रक्रिया टप्प्याटप्प्याने सुरू असल्याने काही महिलांच्या खात्यात रक्कम जमा होण्यास वेळ लागू शकतो.
