पुणे : कीर्तनाचे माध्यम आणि आपल्या परखड शैलीसाठी प्रसिद्ध असलेले प्रसिद्ध कीर्तनकार निवृत्ती महाराज इंदुरीकर पुन्हा एकदा आपल्या विधानांमुळे चर्चेच्या केंद्रस्थानी आले आहेत. माढा तालुक्यातील अंजनगाव येथे आयोजित एका कीर्तन सोहळ्यात त्यांनी वाढत्या वयाच्या राजकारण्यांवर आणि तरुण मुलींच्या पळून जाण्याच्या घटनांवर भाष्य केले.
इंदुरीकर महाराजांनी कीर्तनात बोलताना सांगितले की, सध्या राज्यभरात प्रेमप्रकरणांतून तरुण मुली पळून जाण्याच्या घटनांमध्ये मोठी वाढ झाली आहे. या अशा प्रकारांमुळे पालकांची मानसिक आणि सामाजिक पातळीवर प्रचंड वाताहात होते, अशी खंत त्यांनी व्यक्त केली. याशिवाय राजकारण्यांच्या निवृत्तीच्या वयाबाबत बोलताना त्यांनी थेट मत मांडले. वाढत्या वयानुसार मानवी बौद्धिक क्षमता कमी होत जाते, त्यामुळे 60 वर्षे वय पूर्ण झाल्यानंतर राजकीय नेत्यांनी स्वतःहून राजीनामा देऊन थांबायला हवे, असे रोखठोक विधान त्यांनी केले. वाढत्या वयात काही पुढारी अवाजवी वर्तन करतात, असा टोलाही त्यांनी लगावला.
यापूर्वीही इंदुरीकर महाराज आपल्या वेगवेगळ्या विधानांमुळे आणि कौटुंबिक प्रसंगांमुळे वादात सापडले होते. कीर्तनातून नेहमी लग्नातील अनावश्यक खर्च आणि पैशांची उधळण टाळण्याचा सल्ला देणाऱ्या महाराजांनी स्वतःच्या मुलीच्या, ज्ञानेश्वरीच्या साखरपुड्यात आणि लग्नात मोठा थाटमाट केल्याचा आरोप लोकांकडून झाला होता. एकीकडे इतरांना साधेपणाचे धडे देणारे महाराज स्वतःच्या लेकीच्या लग्नात भव्य मंडप आणि लाखो रुपयांची फुलांची सजावट करतात, यावरून समाजमाध्यमांवर त्यांच्यावर जोरदार टीका झाली होती. त्यावर महाराजांनी, “लेकीच्या हौसेपोटी हे सर्व केले,” अशी सावरासावर केली होती.
एकंदरीत, इतरांच्या मुलींवर आणि पालकांच्या संगोपनावर भाष्य करणाऱ्या महाराजांचे हे नवे विधान समोर आल्यानंतर आता राजकीय वर्तुळातून आणि समाजमाध्यमांतून यावर काय प्रतिक्रिया येतात, याकडे सर्वांचे लक्ष लागले आहे.
