भुलेश्वर, : महाराष्ट्रात जागृत देवस्थान तसेच पुणे जिल्ह्यात शिल्प सौंदर्याचा खजिना म्हणून ओळख असणाऱ्या माळशिरस (ता. पुरंदर) येथील श्री भुलेश्वर मंदिरात आज शुक्रवारी (ता. 28) सूर्य नारायणाने मुख्य गाभार्यातील शिवलिंगापर्यंत जाऊन सोनेरी अभिषेक घातला.
शुक्रवारी सकाळी ठीक 6 वाजून 42 मिनिटांनी सूर्य किरणांनी मंदिराच्या गाभाऱ्यात प्रवेश केला तर 6 वाजून 58 मिनिटांनी श्री भूलेश्वरांच्या मूर्तीस स्पर्श करून सूर्य किरण 7 वाजून 9 मिनिटांनी मूर्तीच्या खालील बाजूला सरकले, असा सरासरी अकरा मिनिटे सूर्यकिरणांचा अभिषेक झाला तर याच काळात प्रदक्षिणा मार्गावर असणाऱ्या विठ्ठल रुक्मिणी मूर्तीवर देखील किरणोत्सव सुरु होता.
दर वर्षी भुलेश्वर मंदिरात 27 मार्च ते 29 मार्च असा सलग 3 दिवस किरणोत्सव असतो. हा किरणोत्सव पाहण्यासाठी महाराष्ट्राच्या कानाकोपऱ्यातून भक्त मोठ्यां संख्येने गर्दी करतात. हा योग वर्षातून 2 वेळाच म्हणजे 27 ते 29 मार्च व 17 सप्टेंबर या दिवशी येतो. मात्र सप्टेंबर महिना हा पावसाळ्याचे असल्यामुळे या काळामध्ये सहसा ढगाळ हवामान असते. यामुळे कधी-कधी सूर्य दिसत नाही. दरवर्षी सप्टेंबर महिन्यामध्ये किरणोत्सव होतोच, असे नाही. मात्र मार्च महिन्यामध्ये हवामान मोकळे असल्यामुळे सूर्यकिरण स्पष्टपणे शिवलिंगावरती मधोमध पडतात. त्यामुळे किरणोत्सव हमकास पहायला मिळतो. भुलेश्वराच्या पिंडीवर सूर्यकिरणांचा अभिषेक लीप वर्ष आले तर एक दिवस अगोदर होतो.
भुलेश्वर मंदिराची रचना इतकी सुंदर प्रकारे केली आहे. या मंदिरामधील शिल्पकला अत्यंत नियोजित आहे. त्यामुळे नियोजित वेळेप्रमाणे भुलेश्वर मंदिराच्या बाहेर असणाऱ्या भिंतीपासून नगारखाण्यावरील नंदीच्या मागे असणारी खिडकी असे सर्व अडथळे पार करत सूर्यकिरणांनी श्री क्षेत्र भुलेश्वर मूर्तीस स्पर्श केला.
दरम्यान, मंदिरातील मूर्ती सोनेरी दिसू लागली. या मूर्तीचे तेज इतके होते की, मंदिरातील गाभारा सुद्धा पूर्णपणे सोनेरी दिसू लागला होता. भुलेश्वराचे मनमोहक रूप पाहून सगळ्यांच्याच डोळ्याचे पारणे फिटले. भुलेश्वर महाराज की जय, हर हर महादेवच्या गजरात मंदिर परिसर दुमदुमून गेला. त्यानंतर, 7 वाजून 9 मिनिटांनी सूर्यकिरण शिवलिंगापासून बाजूला गेले. सरासरी सूर्यनारायनाने अकरा मिनिटे सोनेरी अभिषेक घातला. हा किरणोत्सव पाहण्यासाठी महाराष्ट्राच्या कानाकोपऱ्यातून शिवभक्त मोठ्या संख्येने गर्दी केली होती.
