Fact Check ढाका: शाकिब अल हसनचा एक व्हिडिओ सोशल मीडियावर व्हायरल होत आहे. यामध्ये बांगलादेशी क्रिकेट चाहते शाकिबसोबत भांडताना दिसत आहेत. त्याच्या कॉलरला धरून ओढले जात आहे. या व्हिडिओमध्ये दिसत आहे की, शाकिब एका शॉपिंग मॉलमधून जात असताना संतप्त जमावाने त्याच्यावर हल्ला केला. यानंतर काही चाहते त्याला वाचवतानाही दिसत आहेत. या हल्ल्यादरम्यान त्याला वाचवण्यासाठी ज्वेलरी शोरूममध्ये नेले जाते.
2023 च्या विश्वचषक स्पर्धेत शाकिबच्या नेतृत्वाखाली बांगलादेशच्या खराब कामगिरीमुळे चाहत्यांनी हे लज्जास्पद कृत्य केल्याचे युजर्स सोशल मीडियावर लिहित आहेत. यासोबतच इतरही अनेक गोष्टी लिहिल्या जात आहेत.
व्हिडिओचे सत्य काय आहे?
या व्हिडीओत जे दिसत आहे ते सत्य आहे. पण, ही घटना अलीकडची नाही. विश्वचषकाच्या खूप आधी हे घडले. मार्च 2023 मध्ये साकिब दुबईला एका कार्यक्रमात सहभागी होण्यासाठी गेला होता, तेव्हा ही घटना घडली. याचा बांगलादेशच्या अलीकडच्या कामगिरीशी काहीही संबंध नाही.
Kalesh b/w Bangladeshi Fans and Shakib al hasan, when he returned to Bangladesh after poor World Cup campaign
pic.twitter.com/C7DQK93gAk— Ghar Ke Kalesh (@gharkekalesh) November 21, 2023
विश्वचषकात बांगलादेश संघाची कामगिरी:
बांगलादेश संघाने शाकिब अल हसनच्या नेतृत्वाखाली विश्वचषक 2023 मध्ये सहभागी झाले. लीग स्टेजमधील 9 सामन्यांपैकी या संघाला फक्त दोन सामने जिंकता आले. त्यांनी अफगाणिस्तानविरुद्धच्या विश्वचषकातील पहिल्या सामन्यात एक विजय मिळवला, त्यानंतर शेवटच्या सामन्यात श्रीलंकेचा पराभव करून त्यांनी दुसरा विजय नोंदवला. संघाच्या खराब कामगिरीचा अंदाज यावरूनच लावता येतो की, संघाला नेदरलँडकडूनही पराभव पत्करावा लागला होता.
वर्ल्ड कपमध्ये शाकिब वादात
शाकिब अल हसन वर्ल्डकपमध्ये देखील वादात सापडला होता. संघाच्या सततच्या पराभवामुळे आणि त्याच्या बॅटमधून धावा काढता न आल्याने तो स्पर्धेच्या मध्यभागी थोडा वेळ काढून बांगलादेशला परतला. येथे बालपणीच्या प्रशिक्षकाकडून टिप्स घेऊन तो पुन्हा भारतात परतला. त्याची ही कृती सध्याच्या बांगलादेशी कोचिंग स्टाफसाठी पेच निर्माण करणारी ठरली. यानंतर तो गेल्या सामन्यात मैदानातही उतरला नव्हता.
