India vs South Africa: सेंच्युरियन: भारत आणि दक्षिण आफ्रिका यांच्यातील दोन सामन्यांच्या कसोटी मालिकेतील पहिला सामना सुरु झाला आहे. सेंच्युरियन येथील सुपरस्पोर्ट्स पार्कमध्ये दोन्ही संघ आमनेसामने आहेत. येथे दक्षिण आफ्रिकेचा कर्णधार टेंबा बावुमाने नाणेफेक जिंकून प्रथम गोलंदाजी करण्याचा निर्णय घेतला आहे. दक्षिण आफ्रिकेकडून दोन खेळाडूंना कसोटी पदार्पण करण्याची संधी देण्यात आली आहे. भारतीय संघातही एक खेळाडू कसोटी पदार्पण करत आहे.
नांद्रे बर्जर आणि डेव्हिड बेडिंगहॅम दक्षिण आफ्रिकेसाठी पहिला कसोटी सामना खेळत आहेत. तसेच प्रसिद्ध कृष्णाला भारतीय संघाची कसोटी कॅप मिळाली आहे. नाणेफेकीपूर्वी टीम इंडियाचा उपकर्णधार जसप्रीत बुमराहने त्याला कसोटी कॅप दिली. विशेष म्हणजे दक्षिण आफ्रिकेने आपल्या प्लेइंग-11 मध्ये एकाही फिरकीपटूला संधी दिलेली नाही. दुसरीकडे, भारतीय संघाने रवींद्र जडेजाच्या जागी आर. अश्विनला मैदानात उतरवले आहे. पाठीच्या दुखण्यामुळे जडेजाला बेंचवर बसावे लागणार आहे.
दोन्ही संघांचे प्लेइंग-11
टीम इंडिया: रोहित शर्मा (कर्णधार), यशस्वी जैस्वाल, शुभमन गिल, विराट कोहली, केएल राहुल (यष्टीरक्षक), श्रेयस अय्यर, आर अश्विन, शार्दुल ठाकूर, जसप्रीत बुमराह, प्रसीध कृष्णा, मोहम्मद सिराज.
दक्षिण आफ्रिका: डीन एल्गर, एडन मार्कराम, टोनी डी जिओर्गी, टेम्बा बावुमा (सी), कीगन पीटरसन, डेव्हिड बॅडिंगहॅम, काइल वॉरेन (विकेटकीपर), मार्को यान्सिन, जेराल्ड कोएत्झी, कागिसो रबाडा, नांद्रे बर्गर.
