पुणे : इंग्लंडने ग्रुप १ मध्ये अव्वल स्थानावर असलेल्या न्यूझीलंडचा २० धावांनी पराभव केला आहे. त्यामुळे प्रथम फलंदाजी करणारी इंग्लंड वर्ल्डकपमध्ये पहिल्यांदाच आपल्या खऱ्या रंगात दिसली. या विजयाने ऑस्ट्रेलियाचे टेन्शन वाढले आहे. ग्रुप १ मधील सर्व संघांचे प्रत्येकी ४ सामने झाले आहेत. सध्याच्या घडीला गुणतालिकेत न्यूझीलंड, इंग्लंड आणि ऑस्ट्रेलिया हे सामन म्हणजे प्रत्येकी ५ गुणांवर आहेत. मात्र सरस धावगतीच्या जोरावर न्यूझीलंड अव्वल स्थानावर, इंग्लंड दुसऱ्या तर ऑस्ट्रेलिया तिसऱ्या स्थानावर आहे. त्यामुळे या तिघांमध्येच सध्या तरी सेमी फायनल पार करण्यासाठी चुरस निर्माण झाली आहे.
इंग्लंडचा कर्णधार जोस बटलरने ब्रिस्बेनच्या गाबा स्टेडियमवर नाणेफेक जिंकून फलंदाजीचा निर्णय घेतला. इंग्लंडने २० षटकांत ६ बाद १७९ धावा केल्या. प्रत्युत्तरादाखल न्यूझीलंड संघ केवळ १५९ धावा करू शकला. उपांत्य फेरीच्या दृष्टीने महत्त्वाच्या असलेल्या या सामन्यात दोन्ही संघांनी विजयासाठी शर्थीचे प्रयत्न केले. मात्र, इंग्लंडने अखेरच्या पाच षटकात शानदार गोलंदाजी करत सामना २० धावांनी खिशात घातला. यासह इंग्लंडने उपांत्य फेरीसाठीच्या आपल्या आशा जिवंत ठेवल्या.
धावांचा पाठलाग करण्यासाठी आलेल्या न्यूझीलंड संघाकडून ग्लेन फिलिप्सने ३६ चेंडूत ६२ धावा तडकावल्या. ख्रिस जॉर्डनच्या जागी संघात स्थान मिळालेल्या गोलंदाज सॅम करनने त्याला लॉंग ऑनवर झेलबाद केले. याआधी ख्रिस वोक्सने डॅरिल मिशेलला तंबूत पाठवले. त्याचा झेलही जॉर्डनने लाँग ऑनवर घेतला तो काही काळासाठी क्षेत्ररक्षण करण्यासाठी आला होता. मिशेलला केवळ ३ धावा करता आल्या.
तत्पूर्वी, जोस बटलरने ४७ चेंडूत ७३ धावा करत मोलाचा वाटा उचलला. बटलरने ७३ धावांच्या खेळीत ७ चौकार आणि २ षटकार मारले. इंग्लंडला हा सामना जिंकणे अत्यंत गरजेचे होते नाहीतर त्यांचे विश्वचषकातील आव्हान आजच संपुष्टात आले असते. लियाम लिव्हिंगस्टोनने १४ चेंडूत २० धावा केल्या आणि तो फर्ग्युसनच्या गोलंदाजीवर बाद झाला. न्यूझीलंडसाठी लॉकी फर्ग्युसन सर्वात यशस्वी ठरला. त्याने ४५ धावांत २ बळी घेतले. त्याच वेळी, ईश सोधी सर्वात किफायतशीर असल्याचे सिद्ध झाले. त्याने ४ षटकात २३ धावा दिल्या आणि एक विकेटही घेतली.
