Champions Trophy 2025: सध्या चॅम्पियन्स ट्रॉफी स्पर्धा सुरू आहेत. मात्र यावेळी चॅम्पियन्स ट्रॉफी स्पर्धा पाकिस्तानमध्ये आयोजित केली जात आहे. पाकिस्तानमध्ये आयोजित केल्या जाणाऱ्या या चॅम्पियन्स ट्रॉफी स्पर्धेत भारताने मात्र सुरुवातीपासूनच पाकिस्तानमध्ये सामने खेळण्यास नकार दिला आहे. त्यामुळे या स्पर्धेतील भारताचे सर्व सामने पाकिस्तानमध्ये न होता बाहेर होणार आहेत. मात्र पाकिस्तानात सुरू असलेल्या चॅम्पियन्स ट्रॉफी स्पर्धेवर दहशतीचे संकट आल्याचे समोर आले आहे.
यावेळची चॅम्पियन्स ट्रॉफी स्पर्धा पाकिस्तानात होत आहे. यामुळे जगभरातील क्रिकेट चाहते पाकिस्तानमध्ये जात आहेत. मात्र आता पाकिस्तानमध्ये या परदेशी नागरिकांच्या सुरक्षेचा प्रश्न निर्माण झाला आहे. अशी माहिती पाकिस्तानमधील सुरक्षा यंत्रणांना मिळाली आहे. यामुळे परदेशी नागरिकांच्या सुरक्षेसाठी यंत्रणांना हायअलर्टचा इशारा देण्यात आला आहे.
या बाबत अधिक माहिती अशी की, इंडिया टुडेने दिलेल्या बातमीनुसार, पाकिस्तानी इन्टेलिजन्स ब्युरोने सुरक्षा यंत्रणांना नुकताच एक अहवाल दिला आहे. या अहवालात इस्लामिक स्टेट खोरासन प्रोव्हियन्स या संघटनेकडून पाकिस्तानात होत असलेल्या चॅम्पियन्स ट्रॉफीतील क्रिकेटचे सामने पाहण्यासाठी आलेल्या परदेशी नागरिकांना धोका असल्याचे म्हटले आहे. खंडणीसाठी दहशतवादी संघटनेकडून परदेशी नागरिकांचे अपहरण केले जाऊ शकते, असे या अहवालात नमूद करण्यात आले आहे.
दरम्यान, पाकिस्तानी इन्टेलिजन्स ब्युरोच्या अहवालानुसार इस्लामिक स्टेट खोरासन प्रोव्हियन्स या संघटनेकडून चीन तसेच अरबी नागरिकांचे अपहरण करण्याची शक्यता वर्तवण्यात आली आहे. यामुळे आता पाकिस्तानात होत असलेल्या चॅम्पियन्स ट्रॉफीवर आता दहशतीचे वातावरण निर्माण झाले आहे.
