मुंबई : माजी अनुभवी सलामीवीर फलंदाज गौतम गंभीरची भारतीय क्रिकेट संघाच्या मुख्य प्रशिक्षकपदी नियुक्ती जवळपास निश्चित झाली आहे. बीसीसीआय त्याच्या नावाची औपचारिक घोषणा कधीही करू शकते. गंभीर हा राहुल द्रविडच्या जागी टीम इंडियाचा मुख्य प्रशिक्षक म्हणून काम पाहणार आहे. वृत्तानुसार, बीसीसीआय आणि गौतम गंभीर यांच्यात प्रशिक्षकपदासाठी चर्चा सुरू होती. आता गंभीरच्या नावावर शिक्कामोर्तब झाल्याचे संकेत मिळत आहेत.
राहुल द्रविडच्या जागी गौतम गंभीरला भारतीय क्रिकेटचे प्रशिक्षकपद दिल्यास तो प्रथमच एखाद्या संघाचा प्रशिक्षक बनणार आहे. इंडियन प्रीमियर लीगमध्ये, गौतम गंभीर हा लखनौ सुपरजायंट्स आणि अलीकडेच आयपीएल चॅम्पियन झालेल्या कोलकाता नाइट रायडर्सचा मेंटॉर आहे. मात्र, भारतीय क्रिकेटबद्दलच्या त्याच्या ज्ञानामुळे बीसीसीआय त्याला टीम इंडियाचा प्रशिक्षक बनवू इच्छित आहे.
गंभीरच्या मार्गदर्शनाखाली केकेआर चॅम्पियन –
केकेआरपूर्वी गंभीर हा लखनऊ सुपर जायंट्सचा मेंटॉर होता. त्यांच्या उपस्थितीत संघाने चांगली कामगिरी केली. मात्र, त्याने साथ सोडल्याने लखनऊ संघाची कामगिरी घसरली. लखनऊचा संघ आयपीएल 2024 च्या प्ले ऑफमध्येही पोहोचू शकला नाही. दुसरीकडे केकेआरने विजेतेपद पटकावले. आयपीएल 2024 च्या प्लेऑफमध्ये पोहोचणारा केकेआर हा पहिला संघ ठरला होता.
दमदार आंतरराष्ट्रीय कारकीर्द –
गौतम गंभीरची आंतरराष्ट्रीय कारकीर्द चमकदार आहे. त्याने टीम इंडियासाठी 147 एकदिवसीय सामने खेळले आहेत. या कालावधीत 5238 धावा केल्या आहेत. गंभीरने एकदिवसीय क्रिकेटमध्ये 11 शतके आणि 34 अर्धशतके केली आहेत. त्याने 58 कसोटी सामन्यात 4154 धावा केल्या आहेत. या कालावधीत त्याने 9 शतके आणि 22 अर्धशतके केली आहेत. त्याने द्विशतकही झळकावले आहे. गंभीरने भारतासाठी 37 टी-20 सामनेही खेळले आहेत. यामध्ये 932 धावा केल्या आहेत. या कालावधीत त्याने 7 अर्धशतके केली आहेत.
