पुणे : पुणे शहरातील येरवडा रामवाडी एअरपोर्ट रोडवर गुरुवारी रात्री एक धक्कादायक घटना घडली. एका तरुणावर धारधार शस्त्राने प्राणघातक हल्ला करण्यात आला आहे. या घटनेचा सीसीटीव्ही फुटेज समोर आले असून, या घटनेने पुण्यात खळबळ उडाली आहे. या हल्ल्यात गंभीर जखमी झालेल्या पीडितावर येरवडा (Yerwada Crime) येथील खासगी रुग्णालयात उपचार सुरू असून, या परिसरात अशा प्रकारच्या घटना वारंवार घडत असल्याने नागरिकांमध्ये भीतीचे वातावरण निर्माण झाले आहे.
नेमकं काय घडलं ?
दिप्तिमान देवव्रत दत्ता (वय ३३) असं हल्ला झालेल्या तरुणाचं नाव आहे. तो एका खासगी कंपनीत कर्मचारी आहे. तर या तरुणावर हल्ला करणाऱ्या मुख्य आरोपीचे नाव शिवलिंग म्हात्रे (वय २५) आहे. मिळालेल्या माहितीनुसार, शिवलिंगच्या मैत्रीणीने त्याच्याशी नातेसंबंध तोडून दिप्तिमान दत्ताशी मैत्री केली होती. याच रागातून संतापलेल्या शिवलिंगने हा हल्ला केल्याचे समोर आले आहे. दिप्तिमान आपल्या मैत्रीणीला घेण्यासाठी एअरपोर्ट रोडवर थांबलेला असताना शिवलिंग त्याच्या मित्रासह अचानक तिथे आला आणि दिप्तिमान दत्तावर शस्त्राने हल्ला केला. ही संपूर्ण घटना सीसीटीव्ही फुटेजमध्ये कैद झाली आहे.
या हल्ल्यात शिवलिंगला मदत केलेल्या सिद्धार्थ गादिया आणि बालाजी मुंडे यांना पोलिसांनी अटक केली आहे. मात्र, शिवलिंग म्हात्रे अद्याप फरार आहे. पोलिसांनी त्याचा शोध घेण्यासाठी तपास तीव्र केला असून, त्याच्या ठावठिकाणी नजर ठवून आहेत.
दरम्यान, एअरपोर्ट रोड आणि येरवडा परिसरात अशा प्रकारचे गुन्हे वाढत असल्याने स्थानिक नागरिकांमध्ये असुरक्षिततेची भावना निर्माण झाली आहे. पोलिसांनी या प्रकरणात गुन्हा दाखल केला असून, पुढील तपास सुरु केला आहे.
