येरवडा, (पुणे): येरवड्यात एका अनोख्या घटनेने पोलिस ठाण्यात गुन्हा नोंदवण्यात आला आहे. येरवडा परिसरात असलेल्या गोल्फ क्लब कोर्समध्ये गोल्फ खेळताना मारलेला चेंडू थेट उड्डाणपुलावरील दुचाकीस्वाराच्या छातीवर आदळला. या प्रकरणी येरवडा पोलीस ठाण्यात गोल्फ क्लब व्यवस्थापनाविरोधात व एका अज्ञात तरुणावर गुन्हा दाखल करण्यात आला आहे. शनिवारी (ता. 29) सायंकाळी पाच वाजण्याच्या सुमारास हि घटना घडली आहे. या घटनेमुळे परिसरातील वाहनचालक आणि पादचाऱ्यांच्या सुरक्षेचा प्रश्न निर्माण झाला आहे.

उड्डाण पुलाजवळ असलेले गोल्फ क्लब या घटनेमुळे स्थानिकांसाठी चिंतेचा विषय बनला आहे. या आधीही गोल्फ क्लब मैदानातुन बॉल वाहनांना आणि पादचाऱ्यांना लागल्याचा प्रकार घडला होता. प्रणील अनिल कुसळे (वय-35, रा. येरवडा, पुणे) असे तक्रारदार तरुणाचे नाव आहे. जखमी झालेल्या दुचाकीस्वाराने येरवडा पोलीस स्टेशनमध्ये तक्रार दाखल करून गोल्फ क्लब व्यवस्थापन आणि या घटनेला जबाबदार असलेल्या अज्ञात व्यक्तीविरुद्ध तक्रार दाखल केली असून या घटनेप्रकरणी भारतीय दंड संहिता कलम 125 अन्वये गुन्हा दाखल करण्यात आला आहे.
या परिसरात बॉल वाहन किंवा पादचाऱ्याला लागण्याची ही पहिलीच वेळ नाही. 2023 मध्ये, त्याच महामार्गावर गोल्फ बॉल मोटरसायकलस्वाराला लागल्याने अशीच घटना घडली होती. दरम्यान, या प्रकरणी येरवडा पोलिस ठाण्यात तक्रार दिली होती. त्यावरून पूना क्लब गोल्फ कोर्सचे व्यवस्थापन आणि गोल्फ खेळणाऱ्या अनोळखी व्यक्तीवर गुन्हा दाखल केला होता. भविष्यात अशा घटना घडू नयेत यासाठी गोल्फ क्लबने सुरक्षा जाळ्या बसवणे यासारख्या उपाययोजना करण्याची गरज या घटनेने अधोरेखित केली आहे. मात्र, यानंतरही असे प्रकार घडत असल्याने येथील सुरक्षेबाबत प्रश्नचिन्ह उपस्थित होत आहे. दरम्यान, याप्रकरणी पुढील तपास पोलीस हवालदार रेड्डी करत आहेत.








