पुणे : पुण्यामध्ये गुन्हेगारी घटनांमध्ये दिवसेंदिवस वाढ होताना दिसत आहे. त्यामुळे पुण्यातील कायदा व सुव्यवस्थेवर प्रश्नचिन्ह उपस्थित होऊ लागले आहेत. अशातच पुण्यातून एक धक्कादायक घटना समोर आली आहे. धर्मांतरासाठी एका महिलेवर बंदुकीचा धाक दाखवून सामूहिक बलात्कार करण्यात आल्याची संतापजनक घटना घडली आहे. पुण्याच्या लोहगाव परिसरात हा प्रकार घडला आहे. यामुळे पुण्यात एकच खळबळ उडाली आहे.

याबाबत अधिक माहिती अशी की, पुण्यामध्ये धर्मांतर करण्यासाठी दोघांकडून ३२ वर्षीय महिलेला बंदुकीचा धाक दाखवत तिच्यावर सामूहिक बलात्कार केला. पीडित महिला पुण्यातील लोहगाव परिसरात वास्तव्यास आहे. एका जिम ट्रेनरकडे जिम लावण्यासाठी गेल्यानंतर त्या दोघांची ओळख झाली. यानंतर तिला धर्मांतर करण्यासाठी प्रवृत्त करून एका ५५ वर्षे आरोपी आणि ३० वर्षीय आरोपीने बंदुकीचा धाक दाखवत तिच्यावर आळीपाळीने बलात्कार केला.
सामूहिक बलात्काराचा व्हिडीओ मोबाइलमध्ये कैद..
आरोपींनी सामूहिक बलात्कार केल्याचा व्हिडीओ मोबाइलमध्ये कैद केला आहे. हा व्हिडीओ व्हायरल करण्याची धमकी आरोपींकडून पीडित महिलेला देण्यात येत होती. याप्रकरणी महिलेच्या तक्रारीवरून याप्रकरणात २ पुरुषांसह एका महिलेवर विमानतळ पोलिस ठाण्यात गुन्हा दाखल करण्यात आला आहे. पोलिस या प्रकरणाचा तपास करत असून आरोपींचा शोध घेत आहेत.








