पुणे : मुळशीत खोट्या कागदपत्राच्याआधारे मतदार नोंदणी करण्याचा प्रयत्न उघडकीस आला आहे. या प्रकरणी दोषी व्यक्तींवर गुन्हा दाखल करण्यात आला आहे. पौड पोलीस ठाण्यात गुन्हा दाखल करण्यात आला आहे. अशा प्रकारच्या घटना आपल्या परिसरात घडत असल्याचे निदर्शनास आल्यास तलाठी कार्यालय, पोलीस ठाण्याशी संपर्क साधावा, असे आवाहन मतदार नोंदणी अधिकाऱ्यांनी केले आहे. तसेच तहसीलदार तथा सहायक मतदार नोंदणी अधिकारी रणजीत भोसले यांनी केले आहे.
मतदार याद्यांच्या विशेष संक्षिप्त पुनरीक्षण कार्यक्रमांतर्गत 203 भोर मतदार संघ ता. मुळशी येथील पिरंगुट व यादी भाग क्र. 204 मुकाईवाडी येथे मतदार नोंदणीसाठी ऑनलाईन पद्धतीने मोठ्या प्रमाणात अर्ज क्र.6 दाखल करण्यात आले. या अर्जासोबत रहिवासी पुरावा म्हणून विद्युत देयक जोडण्यात आले होते. याबाबत शंका आल्याने महावितरणच्या संकेतस्थळावर पडताळणी केली, असता तफावत असल्याचे आढळून आले. याप्रकरणी विजय मारणे, अमित शिंदे, भाऊसाहेब मोकर, शकील अहमद व महंमद आलम यांच्याविरुद्ध गुन्हा दाखल करण्यात आला आहे.
निवडणूक आयोगाने विविध माध्यमातून मतदार यादी शुद्धीकरणासाठी कार्यवाही सुरु केलेली आहे. पुणे जिल्ह्यात दुबार नाव नोंदणीचे 28 हजार तर समान छायाचित्राचे 1 लाख 42 हजार 349 मतदार आहेत. संबंधितांनी त्यांना मिळालेल्या नोटीशीवरील पर्याय निवडून 1 जानेवारी 2024 पर्यंत दुरूस्ती करून घेण्याचे आवाहन जिल्हाधिकारी डॉ. राजेश देशमुख यांनी केले आहे.
