लोणी काळभोर : पुणे-सोलापूर राष्ट्रीय महामार्गावर कवडीपाट टोल नाक्याजवळ दुचाकी आणि वॅगनआर कारची समोरासमोर धडक होऊन अपघात झाला. हा अपघात अजिंक्यतारा रिसॉर्टच्या समोर मांजरी फार्म हद्दीत रविवारी सव्वा सात वाजण्याच्या सुमारास झाला. या अपघातात दुचाकीवरील हमाल असलेले दोघेजण गंभीर जखमी झाले आहेत.
लोणी काळभोर येथील मालधक्का येथे हे दोन जण हमाल म्हणून काम करत असल्याची माहिती समोर येत आहे. मिळालेल्या माहितीनुसार, वॅगनआर कार ही पुणे-सोलापूरकडून पुण्याच्या दिशेने चालली होती. तर लोणी काळभोर येथील हमाल दुचाकीवरून विरुद्ध दिशेने टोलनाक्याकडे चालले होते.
View this post on Instagram
दरम्यान, या दोन्ही वाहनांची समोरासमोर धडक झाली. या अपघातात दुचाकीवरील दोन्ही हमाल गंभीर जखमी झाले आहेत. दोन्ही जखमी रुग्णांना लोणी काळभोर येथील शिवम हॉस्पिटलमध्ये उपचारासाठी दाखल करण्यात आले आहे. या घटनेची माहिती मिळताच लोणी काळभोर वाहतूक पोलीस तातडीने घटनास्थळी दाखल झाले. अपघाताच्या वेळी झालेली प्रचंड वाहतूक कोंडी पोलिसांनी सुरळीत केली. नंतर पुणे-सोलापूर राष्ट्रीय महामार्ग वाहतुकीसाठी सुरळीत केला.
