पुणे: स्वारगेट बस स्थानक परिसरात मंगळवार, 25 फेब्रुवारीला पहाटे एका महिलेवर झालेल्या अत्याचार प्रकरणाची गंभीर दखल घेऊन आपल्या कर्तव्यात कसूर केल्याप्रकरणी वरिष्ठ आगार व्यवस्थापक जयेश पाटील, कनिष्ठ आगार व्यवस्थापक पल्लवी पाटील व स्थानक प्रमुख मोहिनी ढगे या तीन अधिकाऱ्यांचे शुक्रवारी निलंबन करण्यात आले आहे. तथापि, यापुढे प्रवाशांच्या सुरक्षिततेबाबत विशेषतः महिला प्रवाशांच्या सुरक्षिततेबाबत महामंडळाच्या कोणत्याही स्तरावर हलगर्जीपणा केल्यास संबंधित अधिकारी व कर्मचाऱ्यांना अशाच प्रकारच्या शिक्षेस सामोरे जावे लागेल, असा इशारा परिवहन मंत्री सरनाईक यांनी दिला आहे.
पुणे येथील स्वारगेट बस स्थानकात 25 फेब्रुवारी रोजी शिवशाही एसटी बसमध्ये एका महिलेवर अत्याचार केल्याची घटना घडली. यासंदर्भात संबंधित महिलेने स्वारगेट पोलीस स्थानकात तक्रार दाखल केली होती. सदर घटनेची गंभीर दखल घेऊन संबंधित बस स्थानकावरील त्या वेळी कर्तव्यावर अंसलेल्या स्थानक प्रमुख तसेच त्या आगाराचे प्रमुख यांची याप्रकरणी प्रवाशांच्या सुरक्षासंदर्भात हलगर्जीपणा दाखविल्याबद्दल विभागनिहाय चौकशी करावी, त्या चौकशीमध्ये ते दोषी आढळल्यास त्यांना तत्काळ निलंबित करावे, असे निर्देश एसटी महामंडळाचे उपाध्यक्ष व व्यवस्थापकीय संचालक यांना दिले होते.
या बस स्थानकावर कार्यरत असलेले सर्व सुरक्षा रक्षक (22) यांना तत्काळ बदलण्यात यावे, तसेच त्यांच्याऐवजी दुसऱ्या सुरक्षा रक्षकांना नेमण्याची मागणी संबंधित सुरक्षा मंडळाला करावी, असे निर्देश दिले होते. त्यानुसार मार्च रोजी आपल्या कर्तव्यात कसूर केल्याप्रकरणी वरिष्ठ आगार व्यवस्थापक, कनिष्ठ आगार व्यवस्थापक, स्थानक प्रमुखांचे निलंबन करण्यात आले आहे.
या घटनेनंतर स्वारगेट बस स्थानकात कार्यरत 22 सुरक्षा रक्षकांच्या जागी नवे 22 सुरक्षा रक्षक तैनात करण्यात आले आहेत. हे सर्व सुरक्षा रक्षक खासगी आहेत, सध्या ‘महिला सन्मान योजने अंतर्गत महिलांना त्यांच्या प्रवास तिकिटामध्ये 50 टक्के सवलत दिली जाते. त्यामुळे महिलांची प्रवासी संख्या मोठ्या प्रमाणात वाढली आहे. स्वारगेट बस स्थानकवरील घडलेली घटना अत्यंत चुकीची असून, एसटीने प्रवास करणाऱ्या महिला प्रवाशांच्या सुरक्षिततेला सर्वोच्च प्राधान्य दिले जाईल, तसेच योजनेच्या नावाप्रमाणे त्यांचा ‘सन्मानजनक प्रवास’ व्हावा, यासाठी आम्ही प्रयत्नशील राहू.
– प्रताप सरनाईक, परिवहन मंत्री.
