पुणे : पुण्यातील कल्याणीनगर भागात भरधाव पोर्शे कारने दिलेल्या धडकेत संगणक अभियंता तरुण-तरुणीचा मृत्यू झाल्याची घटना घडली होती. या घटनेने पुण्यासह राज्यभरात मोठी खळबळ उडाली होती. या प्रकरणात बांधकाम व्यावसायिक विशाल अगरवाल याच्या मुलाला ताब्यात घेण्यात आले. त्यानंतर अग्रवालला मदत करण्यासाठी अनेकांनी प्रत्यक्ष, अप्रत्यक्षपणे मदत केल्याचे समोर आले.
अशातच आता राष्ट्रवादी काँग्रेसचे आमदार सुनील टिंगरे यांची याप्रकरणात चौकशी करण्यात आली आहे. या चौकशीत टिंगरे यांचा या प्रकरणाशी संबंध असल्याचे निष्पन्न झाल्याचे पोलीस आयुक्त अमितेश कुमार यांनी पत्रकारांशी बोलताना सांगितले आहे.
काय म्हणाले अमितेश कुमार?
पोलीस आयुक्त अमितेश कुमार म्हणाले के, कल्याणीनगर पोर्शे कार अपघात प्रकरणाचा तपास पुणे पोलिसांनी योग्य पद्धतीने केलाय. पोलिसांच्या कार्यपद्धती, तसेच तपासासंदर्भात काहींनी शंका उपस्थित केली. समाज माध्यमामध्ये पोलिसांवर टीका करण्यात आली. मात्र, पोलिसांनी तपासात हलगर्जी केली नाही. अपघात प्रकरणात दोषी असलेल्या प्रत्येकावर कारवाई करण्यात आली आहे.
या अपघातानंतर आमदार सुनील टिंगरे येरवडा पोलीस स्टेशन मध्ये गेले होते. त्यांचीही या प्रकरणात चौकशी करण्यात आली आहे. सुनील टिंगरे यांनी पोलिसांवर दबाब आणला का नाही, हे आत्ताच सांगणे योग्य होणार नाही. मात्र, सुनील टिंगरे यांचा कल्याणीनगर अपघात प्रकरणाशी संबंध असल्याचे चौकशीत उघड झाले आहे, असे पोलीस आयुक्त अमितेश कुमार यांनी पत्रकारांशी बोलताना सांगितले.
तसेच या अपघात प्रकरणाचा सखोल तपास सुरू असून पोलिसांनी सर्व शक्यता गृहित धरून तपास केला आहे. तांत्रिक तपासावर पोलिसांनी लक्ष केंद्रीत केले. पोलिसांनी योग्य पद्धतीने तपास करून परिस्थितीजन्य, तसेच तांत्रिक पुरावे गोळा केले आहेत. साडेतीन महिन्यानंतर अपघात प्रकरणातील आरोपींना जामीन झाला नाही. यावरुन पोलिसांनी तपास योग्यरित्या केल्याचे सिद्ध झाले असल्याचे देखील अमितेश कुमार यांनी नमूद केले आहे.
