नीरा: खंडोबाचीवाडी (ता. बारामती) येथील प्रज्वल विशाल लकडे (वय ६) या मुलाचा नीरा डाव्या कालव्यामध्ये पाय घसरून पडल्यामुळे बुडून मृत्यू झाला. रविवारी (दि. ४) दुपारी दोन वाजेपर्यंत लहान मुलांसोबत खेळणारा प्रज्वल अचानक बेपत्ता झाला. यामुळे त्याला शोधण्याचे काम युद्धपातळीवर सुरू होते. शोधाशोध केल्यानंतरही तो मिळून न आल्याने तो हरवल्याची तक्रार वडील विशाल लकडे यांनी करंजेपूल पोलीस चौकीत नोंदवली. दरम्यान, सोमवारी (दि. ५) सकाळी १० वाजता नीरा डाव्या कालव्याजवळ खंडोबाचीवाडी येथील पालथी मोरी येथे मोठ्या पोकलेन मशिनने गाळ उकरून पाहिले असता त्याचा मृतदेह पाण्यावर तरंगताना दिसून आला.
खेळता-खेळता हा मुलगा डाव्या कालव्याच्या भरावावर आला असता पाय घसरून तो पाण्यामध्ये बुडाला, अशी माहिती स्थानिक नागरिकांनी या वेळी दिली. सुमारे १० वर्षांपूर्वी अशीच घटना खंडोबाची वाडी येथे घडली होती. त्या वेळीही दोन निष्पाप लहान मुलांना आपला जीव गमवावा लागला होता. याचीच पुनरावृत्ती या ठिकाणी घडली. खंडोबाचीवाडी येथील अंगणवाडी, जिल्हा परिषद शाळा व माध्यमिक विद्यालय हे नीरा डाव्या कालव्याच्या शेजारीच असल्याने संपूर्ण शाळेच्या ग्राउंडला बंदिस्त कंपाउंड असावे. तसेच डाव्या कालव्यावर अनेक महिला या धुणे धुण्यासाठी येत असतात. या ठिकाणी धोबीघाट बनवावा, अशी मागणी या वेळी महिला व ग्रामस्थांनी केली.
