पुणे : महाराष्ट्र लोकसेवा आयोगाकडून (एमपीएससी) महाराष्ट्र गट ब (अराजपत्रित) सेवा संयुक्त पूर्व परीक्षा २०२४ ही परीक्षा येत्या २ फेब्रुवारी रोजी घेण्यात येणार आहे. या परीक्षेसाठी असणारी प्रश्नपत्रिका आदल्या रात्री उपलब्ध करून देऊ, त्यासाठी त्यासाठी ४० लाख रुपये द्यावे लागतील. विद्यार्थ्यांना अशा प्रकारचे आमिष दाखवणारे फोन आल्याची धक्कादायक माहिती समोर आली आहे. याबाबत अखेर महाराष्ट्र लोकसेवा आयोगाने कुठलाही पेपर फुटलेला नसून सगळे पेपर सुरक्षित असल्याचं परिपत्रकाद्वारे प्रसिद्ध करण्यात आले आहे.
‘नमस्कार सर मी रोहन कन्सल्टन्सी नागपूरमधून बोलत आहे. आपले बोलणे झाल्याप्रमाणे आपण महाराष्ट्र गट ब (अराजपत्रित) सेवा संयुक्त पुर्व परीक्षा २०२४ ही परीक्षा २ फेब्रुवारी रोजी होणार आहे. या परीक्षेचा पेपर आम्ही आपणास उपलब्ध करून देणार आहोत. त्यासाठी आपल्याला एक व्हॉट्सअप कॉलवर एक मिटिंग करावी लागेल. त्यानंतर ठरल्याप्रमाणे होईल.’ असे संभाषण रेकॉर्ड झालेला महिलेच्या आवाजातील एक कॉल विद्यार्थ्याला आला असल्याचे समजते.
अनेक विद्यार्थ्यांना असे फोन आल्याची माहिती विद्यार्थ्यांकडून देण्यात आली. याबाबत अखेर महाराष्ट्र लोकसेवा आयोगाने कुठलाही पेपर फुटलेला नसून सगळे पेपर सुरक्षित असल्याचं परिपत्रकाद्वारे प्रसिद्ध करण्यात आले आहे.
दि.2 फेब्रु.2025 रोजी आयोजित महाराष्ट्र गट ब अराजपत्रित सेवा संयुक्त पूर्व परीक्षा 2024 ची प्रश्नपत्रिका उपलब्ध करुन देण्यासंदर्भात प्रसिध्द बातमीच्या अनुषंगाने प्रसिध्दीपत्रक प्रसिध्द करण्यात आले आहे. प्रस्तुत प्रकरणी पोलीस आयुक्त, पुणे यांच्याकडे तक्रार दाखल करण्यात आली आहे. pic.twitter.com/dBc8T4hl0v
— Maharashtra Public Service Commission (@mpsc_office) January 30, 2025
आयोगाच्या परिपत्रकात नेमकं काय?
‘या संदर्भात स्पष्ट करण्यात येते की, प्रस्तुत परीक्षेच्या सर्व प्रश्नपत्रिका अत्यंत कडेकोट बंदोबस्तात सुरक्षित असून अशा बातमीमध्ये कोणतेही तथ्य नाही. उमेदवारांनी अशा अफवांवर विश्वास ठेवू नये. तसेच असे दूरध्वनी आल्यास contact-secretary@mpsc.gov.in या ईमेलवर या संदर्भातील तक्रार दाखल करावी. उमेदवारांनी अशा प्रकरणांमुळे विचलित न होता अभ्यासावर लक्ष केंद्रित करावे. प्रस्तुत प्रकरणी पोलीस आयुक्त, पुणे यांच्याकडून चौकशी करण्यात येत आहे.’
