पुणे : शरद मोहोळ हत्या प्रकरणाचा मास्टरमाईंड विठ्ठल शेलार याची पोलिसांनी राहत्या घरापासूनच धिंड काढली. मोहोळ हत्या प्रकरणाचा तपास सुरू असताना पुणे पोलिसांच्या गुन्हे शाखेने १९ जानेवारी ला एक मोठी कारवाई केली. शेलार हा रेकॉर्डवरील सराईत गुन्हेगार असून त्याच्यावर अनेक गंभीर गुन्ह्यांची नोंद आहे. पोलिसांनी पोलीसी खाक्या दाखवत गुन्हेगारांची दहशत कमी करण्यासाठी जिथे लहानाचा मोठा झाला त्याच राहत्या घराच्या परिसरातून त्यांची धिंड काढली आहे.
पुण्यातील कुख्यात गुंड शरद मोहोळ याची पाच जानेवारीला गोळ्या झाडून हत्या करण्यात आली होती. लग्नाच्या वाढदिवशीच आरोपी मुन्ना पोळेकर आणि त्याच्या साथीदारांनी शरद मोहोळवर भररस्त्यात गोळीबार केला होता. कोथरूडमधील सुतारदरा परिसरामध्ये हा भयानक प्रकार घडला.
दरम्यान, शरद मोहोळ हत्येतील दुसरा मुख्य आरोपी असलेल्या विठ्ठल शेलारचे गाव मुठा गावापासून नऊ किलोमीटर अंतरावर असलेलं उरवडे गाव आहे. मुळशी खोऱ्यातील या लहान गावांमध्ये वर्चस्व कोणाचं राहणार यातून निर्माण वादातून शरद मोहोळची हत्या झाल्याचं समोर आलं आहे.
दरम्यान, शरद मोहोळची भररस्त्यात हत्या केल्यानंतर नागरिकांच्या मनात आरोपी शेलार याच्याविषयी दहशत पसरली होती. हीच दहशत मिटवण्यासाठी पोलिसांनी शेलार याची भररस्त्यावरून धिंड काढली आहे, या घटनेचा व्हिडिओ सध्या सोशल मिडीयावर वायरल होत आहे. एवढंच नाही, तर शेलारची बुलेटप्रूफ स्कॉर्पिओ गाडी देखील जप्त करण्यात आली आहे.
