पुणे: पुणे शहर आणि ग्रामीण भागातील महाराष्ट्र राज्य परिवहन महामंडळाच्या (एसटी) विविध बस स्थानकांमध्ये आता सुरक्षा व्यवस्थेला अधिक बळकटी देण्यात येणार आहे. स्वारगेट, शिवाजीनगर, पिंपरी-चिंचवड, दापोडी, राजगुरुनगर, भोर अशा प्रमुख स्थानकांमध्ये सुरक्षेच्या दृष्टीने अतिरिक्त उपाययोजना राबवण्यात येणार आहेत.
स्थानकांमध्ये सीसीटीव्ही कॅमेरे, अतिरिक्त सुरक्षारक्षक, पर्याप्त प्रकाश व्यवस्था यासह अनेक गोष्टींसाठी एसटी महामंडळाच्या सुरक्षा समिती पथकाने सूचना केल्या आहेत. अनधिकृत फेरीवाले, विक्रेते आणि बाहेरील खासगी प्रवासी वाहनांच्या प्रतिनिधींना स्थानक परिसरात प्रवेशास बंदी घालण्याचे आदेशही देण्यात आले आहेत.
स्वारगेट स्थानकावरील महिला अत्याचाराच्या घटनेनंतर, राज्याचे परिवहन मंत्री प्रताप सरनाईक यांनी तातडीने प्रतिबंधात्मक उपाययोजनांची अंमलबजावणी करण्याच्या सूचना दिल्या होत्या. त्यानुसार एसटी महामंडळाचे सुरक्षा समिती पथक सोमवारी पुण्यात दाखल झाले आणि त्यांनी स्वारगेट, शिवाजीनगर, पिंपरी-चिंचवड, तळेगाव दाभाडे, मंचर या स्थानकांची पाहणी केली. मंगळवारी तळेगाव दाभाडे, राजगुरूनगर, भीमाशंकर आणि भोर या स्थानकांवरही सुरक्षा स्थितीची पाहणी करण्यात आली.
या पथकात सुरक्षा व दक्षता समितीचे अधिकारी शंकर लाडे, लेखा अधिकारी रोहन गायधनी, स्थापत्य अभियंता राम राशीनकर, विभागीय परिवहन व्यवस्थापक सचिन शिंदे आणि यांत्रिकी अभियंता स्मिता कुलकर्णी सहभागी होते. पुढील दोन ते तीन दिवसांमध्ये इतर तालुकास्तरीय प्रमुख बस स्थानकांचीही पाहणी करण्यात येणार असल्याचे महामंडळाकडून स्पष्ट करण्यात आले आहे.
सुरक्षा समिती पथकाने विविध एसटी स्थानकांवरील सुरक्षेच्या दृष्टीने काही महत्त्वपूर्ण सूचना दिल्या आहेत. दापोडी आणि शिवाजीनगर या महत्त्वाच्या स्थानकांमध्ये प्रवाशांची मोठी वर्दळ लक्षात घेता, येथे अतिरिक्त सुरक्षारक्षकांची नियुक्ती करण्याचे निर्देश देण्यात आले आहेत. यामुळे आपत्कालीन परिस्थितीत त्वरित प्रतिसाद देता येईल, तसेच स्थानकातील शिस्तही अधिक चांगल्या पद्धतीने राखता येईल.
यासोबतच, स्थानकांमध्ये पुरेशी आणि योग्य प्रकाश व्यवस्था असावी, यावरही पथकाने भर दिला आहे. रात्रीच्या वेळी सुरक्षिततेसाठी प्रकाशव्यवस्था अत्यंत महत्त्वाची असल्यामुळे अंधाऱ्या जागा ओळखून त्या भागांतही प्रकाशझोत मिळेल, याची दक्षता घेण्याचे सांगण्यात आले आहे. स्थानक परिसरात अनधिकृत फेरीवाले आणि खासगी प्रवासी वाहनांचे प्रतिनिधी यांना प्रवेशबंदी करण्याचे स्पष्ट निर्देश देण्यात आले आहेत. अशा व्यक्तींमुळे प्रवासी वर्गाची गैरसोय होण्याची शक्यता असते तसेच सुरक्षेला धोका निर्माण होतो.
सुरक्षेचा आणखी एक महत्त्वाचा भाग म्हणजे अधिकाधिक सीसीटीव्ही कॅमेरे बसवणे. यामुळे कोणताही अनुचित प्रकार घडल्यास त्याचे त्वरित परीक्षण करता येईल तसेच तपासात मदत होईल. प्रत्येक महत्त्वाच्या कोनांमध्ये कॅमेरे बसवण्यावर भर दिला आहे.
शेवटी आणि सर्वात महत्त्वाचे म्हणजे, प्रवासी महिलांच्या सुरक्षिततेला सर्वोच्च प्राधान्य द्यावे, अशी सूचना समितीने स्पष्टपणे दिली आहे. महिलांसाठी स्वतंत्र व सुरक्षित प्रतीक्षा कक्ष, तक्रार नोंदवण्यासाठी तत्पर महिला सुरक्षा कर्मचारी, तसेच गरज असल्यास तत्काळ मदत मिळावी यासाठी समर्पित यंत्रणा कार्यान्वित करण्याची आवश्यकता अधोरेखित करण्यात आली आहे.
“शहर, उपनगर आणि ग्रामीण भागांतील एसटी स्थानकांमध्ये सुरक्षेच्या दृष्टिकोनातून पाहणी सुरू आहे. सुरक्षा समितीने दिलेल्या सूचनांची अंमलबजावणी करण्यासाठी स्थानिक स्तरावर नियोजन करण्यात येणार आहे.”
— सचिन शिंदे, विभागीय परिवहन व्यवस्थापक, पुणे
