पुणे: सचिन घायवळ प्रकरणामुळे राज्यातील (Rohit Pawar) राजकारण चांगलेच तापले असून या प्रकरणाने सत्ताधारी आणि विरोधकांमध्ये (Nilesh Ghaywal) आरोप-प्रत्यारोपांची (Pune Politics) नवी मालिका सुरू केली आहे. या गुन्हेगारी प्रकरणाला मिळालेल्या राजकीय वलयामुळे भाजप नेत्यांवर विरोधकांनी तोफ डागली आहे. दरम्यान, शरद पवार गटाचे आमदार रोहित पवार यांनी सचिन घायवळला शस्त्र परवाना मिळवून देण्यात मुख्यमंत्री देवेंद्र फडणवीस यांचा सहभाग असल्याचा दावा करत राजकीय वर्तुळात खळबळ उडवली होती.
मात्र या आरोपांनंतर आता रोहित पवार स्वतःच चर्चेत आले आहेत. सोशल मीडियावर रोहित पवार आणि सचिन घायवळ गप्पा मारताना दिसणारा एक फोटो व्हायरल झाला असून त्यावरून विरोधकांचाही या प्रकरणात सहभाग होता का, अशी चर्चा रंगू लागली आहे. हा फोटो नेमका कुठल्या ठिकाणचा आहे, याची सविस्तर माहिती समोर आलेली नाही. पण फडणवीस यांच्यावर टीका केल्यानंतर काही तासांतच हा फोटो समोर आल्याने त्याला वेगळेच राजकीय महत्व प्राप्त झाले आहे.
भाजपकडून आता सवाल उपस्थित करण्यात येत आहे की, “रोहित पवार स्वतःच सचिन घायवळला शस्त्र परवान्यासंदर्भात मार्गदर्शन करत होते का?” अशी चर्चा सुरू झाली आहे.
दरम्यान, रोहित पवार यांच्या मातोश्री सुनंदा पवार यांचा गुंड निलेश घायवळसोबतचा एक जुना व्हिडिओही सध्या व्हायरल होत आहे. त्या व्हिडिओमध्ये सुनंदा पवार यांनी कोव्हिड काळात शाळेला दिलेल्या मदतीबद्दल निलेश घायवळचे मनापासून आभार मानले होते. “निलेश भाऊंचे मी मनापासून आभार मानते. तुम्ही या शाळेला गरजेची वस्तू दिली, यासाठी तुमचे मनःपूर्वक आभार,” असे त्या व्हिडिओमध्ये म्हणताना दिसत आहेत.
या सलग घडामोडींमुळे घायवळ प्रकरण केवळ एका व्यक्तीपुरते मर्यादित न राहता राज्यातील सत्ताधारी आणि विरोधक दोघांच्याही गळ्यात अडकू लागले आहे. त्यामुळे आगामी काही दिवसांत या प्रकरणाला आणखी कोणते राजकीय वळण मिळते, याकडे राज्याचे लक्ष लागले आहे.
