पुणे: राज्यातील वकिलांची शिखर संघटना असलेल्या बार कौन्सिल ऑफ महाराष्ट्र आणि गोवाच्या उपाध्यक्षपदी पुण्यातील ॲड. राजेंद्र उमाप यांची दुसऱ्यांदा निवड झाली आहे. ॲड. राजेंद्र उमाप यांनी याच टर्ममध्ये यापूर्वी ६ महिने उपाध्यक्ष म्हणून कामकाज पाहिले आहे. त्यांनी या पदाची जबाबदारी योग्य सांभाळून आपल्या कामाचा ठसा उमटविला. त्यांच्या या कामाची दखल घेऊनच त्यांना पुन्हा उपाध्यक्षपदाची संधी मिळाली आहे.
दरम्यान, बार कौन्सिल ऑफ महाराष्ट्र आणि गोवाच्या अध्यक्षपदी नागपूर येथील परिजात पांडे यांची निवड करण्यात आली आहे. या बार कौन्सिलमध्ये महाराष्ट्र आणि गोवा ही दोन राज्ये व दादर नगर हवेली, दीव दमण या दोन केंद्रशासित प्रदेशांचा समावेश आहे.
वकिलांच्या अडचणी सोडविण्यासाठी प्रयत्न करणार आहे. यापूर्वीचा कामाचा अनुभव असून आणखी चांगल्या पद्धतीने काम करणार आहे, असे निवडीनंतर बोलताना नवनिर्वाचित उपाध्यक्ष ॲड. राजेंद्र उमाप यांनी सांगितले.
