पुणे : पंतप्रधान नरेंद्र मोदी यांच्या वाढदिवसाचे औचित्य साधून पुण्यात (Pune News) बुधवारी (17 सप्टेंबर) एका भव्य ड्रोन लाईट शोचे आयोजन करण्यात आले आहे. एस.पी. महाविद्यालयाच्या मैदानावर हा कार्यक्रम पार पडणार असून, रात्री 8 वाजता हा शो सुरु होणार आहे. एकाच वेळी तब्बल 1000 ड्रोन आकाशात सोडण्यात येणार आहेत. तसेच ड्रोनच्या माध्यमातून विविध कलाकृती साकारण्यात येणार आहेत.
अयोध्या आणि वाराणसीनंतर महाराष्ट्रात पहिल्यांदाच अशा प्रकारचा भव्य शो आयोजित करण्यात येत असून, अनेक पुणेकरांना या अनोख्या अनुभवाचा आनंद घेता येणार आहे.
या ड्रोन शोचे आयोजन खासदार मुरलीधर मोहोळ यांनी केले आहे. या ड्रोनच्या माध्यमातून पंतप्रधान मोदी यांच्या कार्यकाळातील विविध कामगिरी, विकसित भारताची संकल्पना आणि महाराष्ट्राचा गौरवशाली इतिहास यांचे दर्शन घडवण्यात येणार आहे.
या कार्यक्रमासाठी पुण्यातील नागरिक उत्सुक असून, पुणेकरांना गायक अवधूत गुप्ते यांच्या मराठी आणि हिंदी देशभक्तीपर गाण्यांचा देखील आनंद घेता येणार आहे. कार्यक्रमाच्या सुरुवातील गायक अवधूत गुप्ते हे अनेक गाणी सादर करणार आहेत.
दरम्यान, सुरुवातीला 16 सप्टेंबर रोजी हा कार्यक्रम आयोजित करण्यात आला होता. मात्र, पावसामुळे तो पुढे ढकलण्यात आला होता. आता 17 सप्टेंबर रोजी या कार्यक्रमाचे आयोजन करण्यात आले आहे.
