यवत, ता. 20 : यवत पोलीस ठाण्याच्या हद्दीतील एका शाळेत अल्पवयीन विद्यार्थिनीचा शिक्षकानेच विनयभंग केल्याचा गंभीर प्रकार उघडकीस आला आहे. या प्रकरणी शाळेतील शिक्षकावर पॉक्सो व अॅट्रॉसिटी अंतर्गत गुन्हा दाखल करण्यात आला आहे. गुरुवारी (ता. 18) दुपारी एक वाजण्याच्या सुमारास हि घटना घडली आहे. (Yavat News)
याप्रकरणी प्रशांतकुमार हरिचंद्र गावडे असे शिक्षकाचे नाव आहे. त्याच्याविरुद्ध पॉक्सो कायद्यासह अनुसूचित जाती व अनुसूचित जमाती (अत्याचार प्रतिबंध) अधिनियमांतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार, शाळेत प्रदर्शनाच्या तयारीसाठी फिर्यादी विद्यार्थिनी व इतर 5 ते 6 विद्यार्थिनी वर्गात काम करत होत्या. त्यावेळी आरोपी शिक्षक वर्गात आला. त्याने फिर्यादीचा उजवा हात हातात धरून “आपण दोघे मिळून स्पर्धेचे नंबर ठरवू” असे म्हणत तिच्या शेजारी बाकावर बसला. त्यानंतर त्याने विद्यार्थिनीचा विनयभंग केल्याचे फिर्यादीत नमूद आहे.
या प्रकरणी यवत पोलीस स्टेशन येथे बी.एन.एस. कलम 74, बालकांचे लैंगिक अत्याचार संरक्षण अधिनियम (POCSO) कलम 8 व 12 तसेच अनुसूचित जाती व अनुसूचित जमाती (अत्याचार प्रतिबंध) अधिनियम कलम 3(1)(w)(i) अंतर्गत गुन्हा दाखल करण्यात आला आहे.
अधिक तपास दौंड उपविभागाचे उपविभागीय पोलीस अधिकारी बापूराव दडस यांच्या मार्गदर्शनाखाली सुरू आहे.
