पुणे : इंधनाच्या वाढत्या किमती आणि वाहनांच्या देखभालीसाठी होणारा खर्च यामुळे खासगी प्रवासी वाहतूक व्यवसायावर आर्थिक ताण वाढला आहे. या पार्श्वभूमीवर पुण्यात खासगी बस आणि कारच्या भाड्यात 20 ते 25 टक्क्यांनी वाढ करण्याचा निर्णय वाहतूकदारांनी घेतल्याची माहिती समोर आली आहे. नव्या शैक्षणिक वर्षापासून स्कूल बसच्या शुल्कातही वाढ होण्याची शक्यता आहे. यासाठी परिवहन विभागाकडे प्रस्ताव पाठवण्यात आला आहे, अशी माहिती पुणे बस अँड कार ओनर्स असोसिएशनचे अध्यक्ष राजन जुनवणे यांनी दिली.
खासगी बसचा वापर शालेय विद्यार्थ्यांची ने-आण, लग्नसमारंभ, धार्मिक यात्रा, सहली तसेच कंपन्यांमधील कर्मचाऱ्यांच्या वाहतुकीसाठी केला जातो. त्यामुळे भाडेवाढ झाल्यास पालकांसह इतर प्रवाशांच्या खिशावरही अतिरिक्त भार पडू शकतो.
वाहतूकदारांच्या म्हणण्यानुसार, गेल्या 5 वर्षांपासून भाड्यात वाढ झालेली नाही. मात्र, या काळात चालकांचे वेतन, वाहनांची दुरुस्ती, देखभाल, आरटीओचे फिटनेस शुल्क, ई-चलन आणि सुरक्षेची उपकरणे बसवण्याचा खर्च वाढला आहे. पेट्रोल, डिझेल आणि सीएनजीच्या किमतींमुळेही आर्थिक गणित बिघडल्याचे संघटनेचे म्हणणे आहे.
किती वाढणार प्रतिकिलोमीटर दर?
प्रस्तावानुसार, विविध क्षमतेच्या बससाठी पुढीलप्रमाणे दरवाढ मागण्यात आली आहे.
-
17 सीटर बस : 23 रुपयांवरून 27 रुपये
-
20 सीटर बस : 25 रुपयांवरून 30 रुपये
-
32 सीटर बस : 33 रुपयांवरून 38 रुपये
-
35 सीटर बस : 36 रुपयांवरून 42 रुपये
-
40 सीटर बस : 41 रुपयांवरून 45 रुपये
-
45 ते 49 सीटर बस : 45 रुपयांवरून 55 रुपये
हे दर प्रतिकिलोमीटरनुसार प्रस्तावित करण्यात आले आहेत. परिवहन विभागाकडून या प्रस्तावावर काय निर्णय घेतला जातो, याकडे आता खासगी बसचालक, पालक आणि प्रवाशांचे लक्ष लागले आहे.
