पुणे : पुण्यात कौटुंबिक वाद आणि छळाच्या आरोपांशी संबंधित दोन धक्कादायक घटना समोर आल्या आहेत. हांडेवाडी येथे घटस्फोटाच्या मागणीवरून होत असलेल्या कथित छळामुळे 41 वर्षीय विवाहितेने आत्महत्या केली. दुसऱ्या घटनेत वडगाव शेरी येथे माहेरहून पैसे आणण्यासाठी दबाव टाकून मानसिक आणि शारीरिक छळ केल्याचा आरोप असून, 23 वर्षीय विवाहितेने जीवन संपवले. या दोन्ही प्रकरणांत संबंधित महिलांच्या पतींना पोलिसांनी अटक केली आहे.
हांडेवाडी येथे 20 ऑक्टोबर रोजी ही घटना घडली. सौमिता गौतम सावू (वय 41) असे मृत महिलेचे नाव आहे. त्यांचा विवाह गौतम विभूतीभूषण सावू (वय 45) यांच्याशी झाला होता. दोघांना 14 वर्षांचा मुलगा आहे. सौमिता एका शाळेत नोकरी करत होत्या, तर त्यांचे पती एका कंपनीत कार्यरत आहेत.
पोलिसांत दाखल झालेल्या तक्रारीनुसार, पतीकडून वारंवार घटस्फोटाची मागणी केली जात होती. या कारणावरून होत असलेल्या कथित मानसिक छळामुळे सौमिता तणावात होत्या. दसऱ्याच्या दिवशी त्यांनी राहत्या इमारतीच्या बाल्कनीतून उडी घेत आत्महत्या केली. या प्रकरणी काळेपडळ पोलिसांनी पतीला अटक केली असून, पुढील तपास सुरू आहे.
वडगाव शेरीतही विवाहितेचे टोकाचे पाऊल
दुसरी घटना वडगाव शेरी परिसरात घडली. प्रियंका सुरेश कांबळे (वय 23) असे मृत विवाहितेचे नाव आहे. त्यांनी राहत्या घरी गळफास घेऊन आत्महत्या केल्याची माहिती आहे.
माहेरहून पैसे आणण्यासाठी पतीकडून दबाव टाकला जात होता आणि मानसिक तसेच शारीरिक छळ केला जात असल्याचा आरोप आहे. या प्रकरणी चंदननगर पोलिसांनी पती सुरेश शिवाजीराव कांबळे (वय 26) याला अटक केली आहे. दोन्ही घटनांचा पुढील तपास पोलीस करत आहेत. आरोपांबाबतचा अंतिम निष्कर्ष तपासातून स्पष्ट होणार आहे.
